VOV4.Sêdang - A pơlê kong kân Trùng Khánh, kong têa Sinuâ, pôa Bùi Thanh Sơn, Ngế xiâm tơpui kâ hiăng trâm mâ pơla peá pâ  ƀă pôa Prak Sokhonn, Ngế xiâm phŏ hnê ngăn tơnêi têa, Ngế xiâm tơpui kâ ƀă Tơrŭm cheăng lâp plâi tơnêi dêi kong têa Kul drêng troh veăng Hôp mâu kăn xiâm tơpui kâ ASEAN - Sinuâ ƀă Hneăng hôp mâu Kăn xiâm tơrŭm cheăng Mekong - Lan Thương roh má 6.

Pôa Bùi Thanh Sơn, Ngế xiâm tơpui kâ trâm mâ peá ngế pro xiâm phŏ hnê ngăn tơnêi têa, Ngế xiâm tơpui kâ ƀă tơrŭm cheăng lâp plâi tơnêi dêi Kul

A rôh trâm mâ, péa ngế kăn xiâm tơpui vâ môi tuăn thăm tơrŭm cheăng pơla Việt Nam - Kul rak ki mơnhông mơdêk tung mâu hơnăm hdrối nah tung pơla ai pơreăng kân; péa pâ tơnêi têa pơtối trâm mâ, tơpui tơno tơrá mâu kăn xiâm ƀă pơtối rak vế ki tơ-ƀrê mâu luât pơkâ tơrŭm cheăng pơla péa pâ.

Péa pâ vâ môi tuăn mơdêk tơrŭm cheăng rak ngăn tíu tơkăng kong, mơdât mot lo hmâng vâ, hlối pro tơ’lêi hlâu ăm tơdroăng tê mơdró tíu tơkăng kong, môi tuăn tơdroăng ăm péa tíu tê mơdró tơkăng kong lâp plâi tơnêi Tân Nam (kong pơlê Tây Ninh) - Mơn Chây (kong pơlê Prey Veng)  pêi cheăng sap hâi lơ 31/5 kố nah.

Gương tơplôu ƀă tơbleăng