VOV4.Sêdang -  Kơxo lơ 6/4, a Hà Nội, Đảng Đoân Măt trâ̆n Tơnêi têa Việt Nam tơkŭm po Hneăng hôp tơbleăng pơkâ dêi Khu xiâm pơkuâ tơdroăng kal kí ‘na hnoăng cheăng kăn ƀô̆. Tiah mê, pôa Đỗ Văn Chiến, kăn pơkuâ ngăn tíu xiâm Đảng, kăn pơkuâ ngăn khu cheăng Đảng, kăn xiâm, pơkuâ Vi ƀan hdroâng kuăn ngo pro kăn pơkuâ ngăn Đảng đoân Măt trâ̆n Tơnêi têa Việt Nam hơnăm 2019 – 2024.

Pôa Trần Thanh Mẫn, Kăn cheăng tung tíu xiâm kal kí, kăn xiâm hnê ngăn Kuô̆k hô̆i veăng hôp a Hneăng hôp. Rơkâu kơ pôa Đỗ Văn Chiến hiăng châ Khu xiâm pơkuâ kal kí pôk pro kăn xiâm pơkuâ ngăn Đảng đoân Măt trâ̆n Tơnêi têa Việt Nam, pôa Trần Thanh Mẫn loi tơngah ƀă hnoăng cheăng nếo, pôa Đỗ Văn Chiến kô rơtế ƀă tâi tâng Đảng đoân Măt trâ̆n Tơnêi têa Việt Nam pêi klêi hnoăng cheăng ki hiăng pơkâ mơ’no, pơtối mơdêk hnoăng cheăng dêi Măt trâ̆n tung hneăng nôkố, tơxâng ƀă tơdroăng ki loi tơngah ki Đảng, Tơnêi têa ƀă kuăn pơlê kum ăm Măt trâ̆n.

Katarina Nga tơplôu ƀă tơbleăng