VOV4.Sêdang - Klêi kơ’nâi pôa Nguyễn Xuân Phúc, ngế cheăng tung tíu xiâm kal kí châ Kuô̆k hô̆i pôk pro Kăn xiâm hnê ngăn Tơnêi têa Kŏng hòa xah hô̆i chuh nghiah Việt Nam, mê pôa Samdech Hun Sen, Ngế pro xiâm hnê ngăn Chin phuh pơtáu kong têa Kul hiăng pơtroh kơthô rơkâu. Pôa Hun Sen tối, loi tơngah tiah kố, xua tơdroăng pơkuâ dêi pôa Nguyễn Xuân Phúc, kăn xiâm hnê ngăn tơnêi têa Việt Nam kô pêi pro klêi mâu tơdroăng ki mơnhông hên tâ nếo ‘na cheăng kâ ƀă pơlê pơla, pêi pro tơdroăng ki pơkâ chiâng tơnêi têa ki mơnhông a hơnăm 2045 ƀă pơtối cho hnoăng cheăng ki kơhnâ tung kơpong ƀă a kong têa ê.

Pôa Hun Sen tơhrâ kô pơtối tơrŭm krá ƀă Ngế pro xiâm hnê ngăn tơnêi têa ki pơtó vâ ‘mâi mơnhông tơrŭm cheăng ki ton xŏn, tung hiâm mơno ki cho kong têa ki achê tơniăn, tơrŭm, hlê plĕng dêi rơpó ƀă tơrŭm xua ki pơxúa tơdjuôm, malối cho rơtế tơkâ luâ pơloăng mơnúa ing pơreăng COVID-19 nôkố.

Katarina Nga tơplôu ƀă tơbleăng