VOV4.Sêdang - Kơxê lơ 24/8, pôa Lê Văn Thành, Ngế pro xiâm phŏ hnê ngăn tơnêi têa rơtế ƀă khu kăn ki pêi dêi hnoăng cheăng hiăng troh pêi cheăng ƀă kong pơlê Long An ‘na hnoăng cheăng hbrâ mơdât pơreăng COVID-19 ƀă tơdroăng cheăng mơnhông mơdêk cheăng kâ rêh ối pơlê pơla dêi kong pơlê.

A rôh pêi cheăng, pôa Lê Văn Thành tối tiah kố, tơdroăng pơreăng a Long An tâ tú ôh tá tơniăn, laga kơxô̆ ngế tâ xuân kâi vâ hbrâ mơdât. Tung mâu hâi la ngiâ, kal pêi pro kơtăng tơdroăng ki klâ ối krê pơlê malối kal athế rĕng tơbleăng tơdroăng ki pâk xo têa môh, têa hế séa ngăn vâ ‘nâi F0 tung lâp kong pơlê vâ kơdroh ki tâ tú dêi pơreăng.

Krê mâu kơpong klâ ối krê, kơpong ki hiăng tro mơdât mot lo kal athế rak tơniăn kế kâ ăm kuăn pơlê. Ôh ti xê ngăn kố cho hnoăng cheăng rêh ối mê ối cho troăng hơlâ hbrâ mơdât pơreăng. ‘Na mâu ngế cheăng hbrâ mơdât pơreăng, tiô pôa Lê Văn Thành, Tơnêi kô ai mâu troăng hơlâ tŏng kum, tơdrêng ăm mâu kong pơlê.

Laga, Long An kal hbrâ rơnáu mâu ngế cheăng, mơhnhôk mâu troăng hơlâ vâ kơjo kum liăn ngân ăm tơdroăng ki hbrâ mơdât pơreăng. Hbrâ mơdât pơreăng rĕng ‘mâi mơnhông tơdroăng cheăng kâ tê mơdró.

Katarina Nga tơplôu ƀă tơbleăng