VOV4.Sêdang - Kơxê lơ 16/4, pôa Nguyễn Khắc Định, kăn xiâm phŏ hnê ngăn Kuô̆k hô̆i, Kăn pơkuâ ngăn Đảng ủy, kăn pơkuâ khu kăn Kuô̆k hô̆i kong pơlê Khánh Hòa pơkuâ po rôh hôp khu pơkuâ ngăn Đảng ủy Khánh Hòa hmâng tơdroăng ki tối tơbleăng ‘na hnoăng cheăng ‘mâi rơnêu túa pơkâ tơdjuôm Kơpong cheăng kâ Vân Phong ƀă Tơdroăng tơkêa, troăng hơlâ mơnhông mơdêk kơpong cheăng kâ kố. Tiô pơkâ mơ’no dêi mâu tíu pêi cheăng tiâ mơnhên, Kơpong cheăng kâ Vân Phong ai tâi tâng ƀăng tơnêi lối 150 rơpâu ha, tung mê, tơnêi ƀă chuăn châ tơdế. Tíu pêi cheăng tiâ mơnhên pơkâ thế ‘mot tơ’nôm môi iâ ƀăng tơnêi dêi cheăng Xuân Sơn, tơring Vạn Ninh dâng 3.500 ha ƀă hdi têa kơxĭ dâng 1.500 ha. Pôa Nguyễn Khắc Định, kăn xiâm phŏ hnê ngăn Kuô̆k hô̆i, kăn pơkuâ ngăn Đảng ủy Khánh Hòa pơkâ thế, mâu khu râ, kơvâ cheăng, kong pơlê Khánh Hòa rê̆ng mơjiâng Tôh pêi hnoăng cheăng tơrŭm ƀă Khu rak ngăn kơpong cheăng kâ Vân Phong, tŏng kum túa pơkâ Kơpong cheăng kâ Vân Phong mot tung tơdroăng pơkâ tơdjuôm dêi kong pơlê Khánh Hòa.

Katarina Nga tơplôu ƀă tơbleăng