VOV4.Sêdang - Kơxo lơ 18/3, a Hà Nội, Khu pơkuâ hnê mơhno Tơnêi têa ‘na hbrâ mơdât kâ kơhveăm liăn ngân hiăng tơkŭm po Roh hôp ing pơkuâ dêi pôa Nguyễn Phú Trọng, Kăn xiâm pơkuâ hnê ngăn Đảng, Kăn xiâm hnê ngăn tơnêi têa, Kăn pơkuâ hnê mơhno vâ tơpui tơno, tối ‘na tơdroăng hnê mơhno tơleăng mâu roh tơdroăng, roh tơdroăng ối tung Khu hnê mơhno seá ngăn, hnê mơhno ing klêi kơ’nâi roh hôp má 19 troh nôkố.

‘Na hnoăng cheăng tung la ngiâ, pôa Nguyễn Phú Trọng môi tuăn ƀă rơkong tơpui dêi mâu khu tơrŭm cheăng ối tung Khu hnê mơhno, pơkâ mâu khu râ kăn cheăng Đảng, khu tơrŭm cheăng Đảng pơtối thăm mơnhông tơdroăng hbrâ mơdât kâ kơhveăm liăn ngân ƀă khŏm mơ-eăm pêi tơdroăng kal kí, pêi kơtăng, châ ƀrê; thăm pêi pro kơtăng, mơ-eăm đi đo.

Pôa Nguyễn Phú Trọng pơkâ thế Khu pơkuâ cheăng pơtối tơmâng xo rơkong tơpui dêi mâu khu râ kăn pơkuâ hnê mơhno tơ’nôm, pêi kêi đeăng tơbleăng tối, loi tơngah ƀă mâu tơdroăng châ tơƀrê tâ nếo ƀă khŏm mơ-eăm hên tâ mê nếo tung tâi tâng Đảng, tâi tâng kuăn pơlê pơtối pêi tơ-tro tâ tung tơdroăng hbrâ mơdât kâ kơhveăm liăn ngân tung la ngiâ.

A Sa Ly tơplôu ƀă tơbleăng