VOV4.Sêdang - Châ tâng tối tơbleăng tơdroăng pơreăng COVID 19 a kong têa Kul xông tâ tú, pôa Nguyễn Phú Trọng, Kăn xiâm pơkuâ hnê ngăn Đảng hiăng chêh kơthô kơ-êng pôa Samdech Techo Hunsen, Kăn xiâm hnê ngăn Đảng kuăn pơlê Kul, Ngế pro xiâm hnê ngăn Chin phuh Kul. Teăng mâ Đảng, Tơnêi têa, kuăn pơlê Việt Nam, pôa Nguyễn Phú Trọng pơtroh rơkong troh pôa Samdech Techo Hunsen ƀă mâu khu râ kăn pơkuâ Đảng kuăn pơlê kong têa Kul, Tơnêi têa ƀă kuăn pơlê Kul mâu tơdroăng tuăn pâ nhŏng o ƀă rơkong kơ-êng tá hiâm mơno ‘na mâu tơdroăng ki tro tơ’nhê xua pơreăng COVID 19 pro a kong têa Kul.

Ƀă khôi túa rŭm môi tuăn, achê, rak ngăn dêi pó, tŏng kum dêi pó pơla péa Đảng, péa Tơnêi têa ƀă kuăn pơlê péa tơnêi têa, Việt Nam đi đo hbrâ tơrŭm, tŏng kum, hnê dêi pó túa ki rơkê tơtro tung ivá kâi chiâng pêi vâ rơtế ƀă kong têa Kul tung roh tơplâ mơdât pơreăng COVID 19, vâ péa tơnêi rơtế rĕng tơniăn.

A Sa Ly tơplôu ƀă tơbleăng