VOV4.Sedang - Kơxo hâi lơ 23/5, pôa Nguyễn Phú Trọng, Kăn xiâm pơkuâ hnê ngăn Đảng hiăng pêi pro hnoăng tâ phĭu a tíu tâ phĭu 58 Nguyễn Du, pơlê kân Hai Bà Trưng, Hà Nội. Tiâ rơkong kơ-êng a ngiâ kơdrâm khu chêh hlá tơbeăng tung tơnêi têa ƀă kong têa ê klêi kơ’nâi tâ phĭu, pôa Nguyễn Phú Trọng tối pói vâ, xuân môi tiah rêm ngế kuăn pơlê tâ phĭu lâp tơnêi têa, tâi tâng mâu kăn teăng mâ Kuô̆k hô̆i hneăng má XV ƀă kăn teăng mâ Hô̆i đong kuăn pơlê mâu râ châ rah xo roh kố, kô tâi hiâm mơno xua tơnêi têa, kum ăm tơnêi têa, pêi pro tŭm hnoăng kân dêi tơná tiô tro luât ƀă luât pơkâ.

Pôa Nguyễn Phú Trọng, Kăn xiâm pơkuâ hnê ngăn Đảng xông tơpui klêi kơ'nâi tâ phĭu

Ki má lối môi tuăn ƀă Tơnêi têa, ƀă kuăn pơlê, ƀă Luât tơnêi têa Kŏng hoa xah hô̆i chuh ngiah Việt Nam, pêi pro tŭm hnoăng dêi kăn teăng mâ châ kuăn pơlê rah xo, teăng mâ ăm kuăn pơlê veăng pơkuâ tơnêi têa, pơkuâ pơlê pơla.

Pôa Nguyễn Phú Trọng tối nhên: hneăng tâ phĭu roh kố tơkŭm po châ tơƀrê lĕm, pro ăm phiu ro hâi ki leh kân dêi tâi tâng kuăn pơlê, hâi phiu ro kân dêi tơnêi têa pin.

A Sa Ly tơplôu ƀă tơbleăng