VOV4.Sêdang - Hâi lơ 22/3,  Pôa Nguyễn Phú Trọng, Kăn xiâm pơkuâ hnê ngăn Đảng, Kăn xiâm hnê ngăn tơnêi têa krếo phôn tơpui ƀă pôa  Yoshihide Suga, Kăn xiâm hnê ngăn Đảng Dân chủ Tự do, Ngế pro xiâm hnê ngăn kong têa Nhuk. Pôa Nguyễn Phú Trọng mơnê kơ Đảng Dân chủ Tự do Nhuk hiăng krếo phôn rơkâu kơ hneăng hôp kân Đảng tơnêi têa pin má 13; mơnê Kăn xiâm hnê ngăn Đảng Dân chủ Tự do, pôa Yoshihide Suga, Ngế pro xiâm hnê ngăn kong têa Nhuk hiăng  krếo phôn rơkâu kơ pôa Nguyễn Phú Trọng. 

Pôa Nguyễn Phú Trọng, Kăn xiâm pơkuâ hnê ngăn Đảng tơpui tơno ƀă pôa Yoshihide Suga, Ngế pro xiâm hnê ngăn kong têa Nhuk

Pôa Nguyễn Phú Trọng tối nhên, tung hơnăm hdrối nah tơdroăng tơrŭm pơla Việt Nam - Nhuk xuân môi tiah pơla Đảng Kŏng sản Việt Nam ƀă Đảng Dân chủ Tự do Nhuk dế pơtối mơnhông tơ-brê, tối Việt Nam ngăn Nhuk cho kong têa ki tơrŭm kal má môi, ton ta ah, loi nhoăm khât; pâ thế péa pâ mơdêk trâm tơpui tơno tơrá mâu kăn rơtế veăng kum Việt Nam pêi pro klêi mâu tơdroăng pơkâ mơnhông cheăng kâ - rêh ối pơlê pơla ki Hneăng hôp má 13 hiăng tơbleăng, mơdêk tơrŭm pơla peá pâ ‘na cheăng kâ.

Gương tơplôu ƀă tơbleăng