VOV4.Sêdang - A hâi tâ phĭu lơ 23/5, pôa Nguyễn Xuân Phúc, Kăn xiâm hnê ngăn tơnêi têa kô tâ phĭu a tơring Củ Chi, Pơlê kong kân Hồ Chí Minh. Kố cho tơdroăng châ kăn teăng mâ Vi ƀan tâ phĭu tơring Củ Chi tơbleăng a roh hôp má 13 dêi Vi ƀan tâ phĭu Pơlê kong kân Hồ Chí Minh tơkŭm po kơxê lơ 18/5. Tiô Vi ƀan tâ phĭu tơring Củ Chi, a hâi lơ 23/5, tíu ki Kăn xiâm hnê ngăn tơnêi têa tâ phĭu a kơpong kơphô̆ 7, pơlê kân Củ Chi, tơring Củ Chi.

Mâu khu kŏng an, mô đô̆i hiăng châ xing xoăng hnoăng cheăng nhên a tíu ki Kăn xiâm hnê ngăn tơnêi têa tâ phĭu. Ƀă tơdroăng tâ phĭu a Hngêi pơkeăng pơlât mâu ngế tro tâ pơreăng a Củ Chi, tơring kô djâ kơthung tâ phĭu troh, tơ’nôm rêm tôh tâ phĭu ai 2 ngế thái pơkeăng, ƀok thái pơkeăng ối tung mê vâ pêi pro tơdroăng xêo ngăn kơtâ phĭu. Kuăn pơlê kô châ xing xoăng ăm loăng chêh, loăng rek ki xúa môi xôh.

A pơlê kong kân Hồ Chí Minh, pôa Nguyễn Xuân Phúc cho ngế tơbriât to pro kăn Kuô̆k hô̆i hneăng má XV tíu cheăng kơxô̆ 10 (tơring Củ Chi ƀă tơring Hóc Môn).

A Sa Ly tơplôu ƀă tơbleăng