VOV4.Sedang - Tung  hâi sôk ro - Hâi lêh tơnêi têa - tâi tâng kuăn pơlê lăm tâ phĭu, kơxo lơ 23/5, pôa Nguyễn Xuân Phúc, Kăn xiâm hnê ngăn tơnêi têa ƀă kơdrâi pôa ƀă mâu kơpong tâ phĭu kơxô̆ 041, tíu tâ phĭu  kơxô̆ 9 (pơlê kân Củ Chi, tơring Củ Chi, Pơlê kong Hồ Chí Minh) hiăng tâ mâu phĭu rah xo kăn Kuô̆k hô̆i hneăng 15 ƀă Hô̆i đong hnê ngăn rêm râ hneăng 2021-2026.

Pôa Nguyễn Xuân Phúc, Kăn xiâm hnê ngăn tơnêi têa ƀă kơdrâi pôa lăm tâ phĭu

Klêi tâ phĭu, pôa Nguyễn Xuân Phúc hiăng tiâ khu chêh hlá tơbeăng kơ-êng. Kăn xiâm hnê ngăn tơnêi têa tối nhên, tơrŭm môi tuăn hdroâng mơngế cho tơdroăng ki kân ki Đảng, Pôa Hồ nhoăm pâ thế đi đo tơmâng, hnê mơhno malối a mâu hâi leh kân môi tiah hâi lêh kân dêi tơnêi têa, tâi tâng kuăn pơlê lăm tâ phĭu ƀă pêi mâu tơdroăng cheăng kal ki ê dêi tơnêi têa.

Malối, tá drêng tơnêi têa trâm pá xua kong mêi têa kân lân lu, ki tơrŭm môi tuăn tâi tâng kuăn pơlê pơtối châ rak vế pêi pro. Kố xuân cho tơdroăng hmâ pêi pro ing nah dêi hdoâng mơngế Việt Nam. Ing tơdroăng pêi pro mê ôh tá la lâi pơtê rế hên tâ ƀă pơtối rak vế ki rơdêi ing tung pơlê pơla, tung tơplâ mơdât pơreăng.

Gương tơplôu ƀă tơbleăng