VOV4.Sêdang - Pôa Nguyễn Xuân Phúc, Kăn xiâm hnê ngăn tơnêi têa nếo ai roh trâm mâ 45 ngế kăn teăng mâ ngế tê mơdró mô đô̆i hneăng hdrối nah kơhnâ rơkê, teăng mâ ăm mâu ngế tê mơdró dêi Khu tơrŭm tê mơdró Mô đô̆i hneăng hdrối nah lâp tơnêi têa. Teăng mâ kăn pơkuâ Đảng, Tơnêi têa, pôa Nguyễn Xuân Phúc, Kăn xiâm hnê ngăn tơnêi têa kơdeăn, kheăn hôm păng ‘nâng Khu ƀă mâu khâu tơrŭm tê mơdró pơtối mơnhông hiâm mơno, tơdroăng pêi cheăng – rêh ối lĕm tro tiô hnoăng ‘’Mô đô̆i Pôa Hồ’’, hiăng ai hên tơdroăng ki châ tơƀrê tung pêi kâ – tê mơdró ƀă tơdroăng pêi ki rơkê lĕm, pôu râng hnoăng cheăng pơlê pơla ƀă tơnêi têa.

Pôa Nguyễn Xuân Phúc, Kăn xiâm hnê ngăn tơnêi têa trâm mâ mâu kăn teăng mâ ngế tê mơdró mô đô̆i hneăng hdrối nah

Ki rơhêng vâ tối, Kăn xiâm hnê ngăn tơnêi têa pơchân tối mâu ngế tê mơdró tơtrŏng thăm mơnhông tơtêk lĕm, xúa kŏng ngê̆ mơjiâng ki kơnâ tâk, ai mâu tơdroăng pêi veăng rak vế kong prâi rêh rế hía rế tơtro tâ. Mâu ngế tê mơdró mô đô̆i hneăng hdrối nah kal pơtối mơnhông hiâm mơno “Mô đô̆i Pôa Hồ” vâ pơtối troh lâp lu tơdroăng pâ nhuô̆m tơnêi têa djâ troăng ahdrối dêi mâu ngế tê mơdró mô đô̆i hneăng hdrối nah troh mâu râ kuăn pơlê, mơnhông tơdroăng tơmiât ai mơ-eăm xêh, mơjiâng khu tê mơdró mơnhông mơdêk krá tơniăn, veăng kum ƀlêi trâng hbrâ mơdât COVID-19, tơniăn dêi Việt Nam.

A Sa Ly tơplôu ƀă tơbleăng