VOV4.Sêdang - Pêi pro tiô tơdroăng mơhnhôk kuăn pơlê hdrối roh tâ phĭu rah xo Kăn teăng mâ Kuô̆k hô̆i hneăng má XV ƀă kăn teăng mâ Hô̆i đong kuăn pơlê hneăng hơnăm 2016 – 2021, tung péa hâi, lơ 9 ƀă lơ 10 khế 5, pôa Nguyễn Xuân Phúc, Kăn xiâm hnê ngăn tơnêi têa ƀă mâu ngế tơbriât to pro kăn hiăng trâm mâ kuăn pơlê a péa tơring Củ Chi ƀă Hóc Môn, pơlê kong kân Hồ Chí Minh.

Tối tơdroăng pêi cheăng dêi tơná, pôa Nguyễn Xuân Phúc tối, hnoăng cheăng má môi dêi mâu ngế tơbriât to pro kăn teăng mâ Kuô̆k hô̆i, kăn teăng mâ Hô̆i đông kuăn pơlê thế đi đo tơmâng tơdroăng pói vâ dêi kuăn pơlê, tối teăm tơdrêng tơdroăng troh Kuô̆k hô̆i, Hô̆i đong kuăn pơlê ƀă mâu kơ koan cheăng vâ veăng mơjiâng tơnêi têa ƀă pơlê kong kân Hồ Chí Minh, tiô rơxông nếo, tuăn pâ, rak vế ki kơnâ khôi túa lĕm.

Teăng mâ mâu ngế tơbriât cheăng, pôa Nguyễn Xuân Phúc pói vâ mâu ngế tơbriât cheăng veăng tơpui vâ péa tơring rĕng chiâng pơlê kân ối tung pơlê kong kân. Ƀă Củ Chi, Kăn xiâm hnê ngăn tơnêi têa tối, mâu ngế tơbriât to pro kăn kal tơmâng pơ’lêh nếo tung tơtêk cheăng kâ, tung mê, kal mơnhông tơdroăng tê mơdró, pêt loăng tíu kơdrâm kuăn pơlê rêh ối, mơnhông Củ Chi chiâng pơlê kân tíu drô kĭng ngiât lĕm dêi Pơlê kong kân Hồ Chí Minh.

A Sa Ly tơplôu ƀă tơbleăng