VOV4.Sêdang - Xuân drêng pơxiâm po roh hôp má 11, Kuô̆k hô̆i hneăng 14, pôa Nguyễn Xuân Phúc, Ngế pro xiâm hnê ngăn tơnêi têa hiăng tơbleăng tơdroăng cheăng hneăng hơnăm 2016-2021 dêi Chin phuh. Ƀă troăng hơlâ “Chin phuh ki nếo mơnhông mơdêk, pêi cheăng tơdrăng lĕm, pêi cheăng kơtăng, pêi cheăng kum Kuăn pơlê”, hneăng hdrối, Chin phuh, Ngế pro xiâm hnê ngăn Chin phuh hiăng tơkŭm hnê mơhno ăm rêm râ, kơvâ cheăng pêi kơtăng, tơdrêng tâi tâng, tơ-ƀrê tiô mâu pơkâ, tơdroăng cheăng, troăng hơlâ pơkâ a tâi tâng mâu tơdroăng cheăng.

Pôa Nguyễn Xuân Phúc, Ngế pro xiâm hnê ngăn tơnêi têa tơbleăng tơdroăng cheăng hneăng 2016-2021 dêi Chin phuh

Pôa Nguyễn Xuân Phúc tối, Chin phuh pơkâ thế tơniăn ‘na cheăng kâ kân, kâi mơdât ki pro to kơnâ yă, pro tơniăn tơdâng tơ’mô, pro tơ’lêi hlâu tung tơdroăng mơnhông cheăng kâ, ngăn mê cho tơdroăng pêi pro tơchoâm ki kal tung pơkuâ hnê mơhno. Malối, Chin phuh, Ngế pro xiâm hnê ngăn Chin phuh hiăng mơ-eăm hnê mơhno tơbleăng tâi tâng mâu pơkâ, tơdroăng cheăng ki kal dêi Khu hnê mơhno xiâm tơnêi têa ‘na hbrâ mơdat kâ kơluâ.

Tơleăng mơnhên hên tơdroăng, xo tơvêh hên tơmeăm khoăng; mơjiâng Tôh pêi cheăng ki kal vâ tơleăng mơnhên klêi hên tơdroăng săm phoăng, săm tơkêng ki pá tơvâ tơvân, mơdoh mơdon hâi.

Gương tơplôu ƀă tơbleăng