VOV4.Sêdang - Kơxê lơ 23/3, a Tíu pêi cheăng Chin phuh, pôa Nguyễn Xuân Phúc, Ngế pro xiâm hnê ngăn tơnêi têa tơdah pôa Thomas Schuller Gotzburg, Kăn teăng mâ kong têa Áo ƀă pôa Ingolf Schroeder, Kăn pơkuâ Kŏng ti AT ƀă S dế ti tăng tíu mơ’no liăn cheăng tơdroăng tơkêa bro kơmăi kơmok kân rơdâ. Pôa Nguyễn Xuân Phúc phiu ro hlo pôa Ingolf Schroeder ƀă mâu ngế pêi cheăng dêi Kŏng ti AT ƀă S  troh hriăn plĕng ƀă mơ’no liăn cheăng, tê mơdró a Việt Nam. Kăn teăng mâ kong têa Áo tối loi tơngah tơdroăng tơkêa bro ki AT ƀă S po rơdâ pêi pro kô tơtro mơnhông mơdêk dêi Việt Nam ‘na mơhnhôk mơ’no liăn cheăng kơmăi kơmok rơxông nếo.

Pôa Nguyễn Xuân Phúc, Ngế pro xiâm hnê ngăn tơnêi têa tơdah kăn teăng mâ Kŏng hoa Áo

Kố cho tơdroăng tơkêa bro kân dâng 1,5 rơtal euro, mơhnhôk dâng 6 rơpâu ngế pêi cheăng. Phiu ro mâu troăng tơmêi pêi dêi AT ƀă S, pôa Nguyễn Xuân Phúc tối nhên, mâu tơdroăng tơkêa bro mơ’no liăn cheăng FDI pơrá châ tơbrê.

Chin phuh Việt Nam pro tơ’lêi hlâu ăm mâu khu mơ’no liăn cheăng a kong têa ê pêi cheăng châ tơbrê a Việt Nam. Ngế pro xiâm hnê ngăn tơnêi têa tối hngêi trăng, troăng klông a Thái Nguyên ƀă pơlê kong kân Hồ Chí Minh pơrá tơ’lêi hlâu. Kố xuân cho roh tơ’lêi ƀă mâu khu tê mơdró kân dêi kong têa ê. Ngế pro xiâm hnê ngăn tơnêi têa pói vâ AT ƀă S rĕng pơkâ mơ’no liăn cheăng.

Katarina Nga tơplôu ƀă tơbleăng