VOV4.Sêdang - Kơxê lơ 5/4, pôa Phạm Minh Chính, Ngế pro xiâm hnê ngăn Chin phuh hiăng pêi pro tơdroăng krâ kơlŏng tơkêa a hlá cơ Tơnêi têa, a ngiâ Kuô̆k hô̆i ƀă hên hĭn kuăn pơlê tung lâp tơnêi têa. Hdrối mê, ƀă ki hên kơxô̆ phĭu vâ, Kuô̆k hô̆i hiăng tơbleăng tơdroăng pơkâ pôk pôa Phạm Minh Chính pro Ngế pro xiâm hnê ngăn Chin phuh tơnêi têa Kŏng hòa xah hô̆i chuh ngiah Việt Nam. 

Pôa Phạm Minh Chính châ pôk pro Ngế pro xiâm hnê ngăn Chin phuh

Tơpui drêng xo pêi dêi hnoăng cheăng, pôa Phạm Minh Chính, Ngế pro xiâm hnê ngăn Chin phuh tơhrâ kô pêi tâi ivá dêi tơná, tơkâ luâ mâu tơdroăng ki xơpá, pơloăng mơnúa; pơtó, mơdêk khôi túa ton nah ƀă tơdroăng ki rơkê plĕng kơnía git dêi mâu ngế ki pro Ngế pro xiâm hnê ngăn tơnêi têa ing rôh hdrối mê hía nah; mơ-eăm rơtế ƀă mâu kăn cheăng tung Chin phuh tơrŭm, tơdrăng, pêi pro kơhnâ, tơƀrê, tâi ivá kum Tơnêi têa, kum Kuăn pơlê, tâi tâng xua ki pơxúa dêi Đảng, dêi tơnêi têa, dêi hdroâng mơngế.

Chin phuh ƀă Ngế pro xiâm hnê ngăn Chin phuh hneăng ki kố hiăng pơtối mơdêk hiâm mơno hơ’leh nếo rơkê plĕng, hiâm mơno khên tơnôu loi tơngah mơ-eăm ƀă pêi klêi hên tơdroăng ki kal, tâi tâng tung mâu kơvâ cheăng.

Katarina Nga tơplôu ƀă tơbleăng