VOV4.Sêdang - Kơxê hâi lơ 12/5, pôa Phạm Minh Chính, Ngế pro xiâm hnê ngăn Chin phuh hiăng tơpui phôn ƀă pôa Prayut Chan-o-cha, Ngế pro xiâm hnê ngăn kong têa Siam. Pôa Phạm Minh Chính mơnhên hbrâ tơrŭm krá tơniăn ƀă Ngế pro xiâm hnê ngăn kong têa Siam vâ djâ tơrŭm cheăng “Khu tơrŭm cheăng ton xŏn pơla Việt Nam – Siam’’ rế hía rế trâu hơngế, châ tơƀrê ƀă châ tơtro dâi khât. 

Pôa Phạm Minh Chính, Ngế pro xiâm hnê ngăn Chin phuh tơpui phôn ƀă Ngế pro xiâm hnê ngăn kong têa Siam

Tơpui tơno nhên ‘na troăng thăm tơrŭm cheăng pơla péa tơnêi têa, Ngế pro xiâm hnê ngăn tơnêi têa pơkâ mâu kơ koan ki tơdjâk tơrŭm tơkŭm po tơtro mâu tơdroăng leh tơbâ 45 hơnăm mơjiâng tơrŭm cheăng tơpui kâ Việt Nam – Siam tung hơnăm 2021, rak tơniăn tơtro, ví tơdroăng pêi bu to vâ khoh ai; pơtối rak ƀă mơnhông châ tơƀrê mâu troăng tơrŭm cheăng pơla péa pâ.

‘Na tơrŭm kơpong ƀă lâp plâi tơnêi, péa Ngế pro xiâm hnê ngăn tơnêi têa môi tuăn thăm tơrŭm krá tơniăn ƀă tŏng kum dêi pó tung hên tơdroăng môi tiah Khu lâp kong têa, ASEAN, APEC, thăm tơrŭm troăng klông, xuân môi tiah thăm mơnhông krá tơniăn a kơpong Mekong.

A Sa Ly tơplôu ƀă tơbleăng