VOV4.Sedang - Kơxê lơ 23/4, a Tíu pêi cheăng Kăn xiâm pơkuâ tơnêi têa Bogor a pơlê kong xiâm Jakarta, kong têa Indonesia ahdrối veăng Hneăng hôp ki phá tơ-ê mâu khu râ kăn pơkuâ ASEAN, pôa Phạm Minh Chính, Ngế pro xiâm hnê ngăn tơnêi têa hiăng troh koh tơpui tơno ƀă pôa Joko Widodo, Kăn xiâm pơkuâ kong têa Indonesia. Pôa Joko Widodo phiu ro tơdah pôa Phạm Minh Chính hiăng châ Kuô̆k hô̆i loi tơngah rah xo to pro Ngế xiâm pơkuâ tung Chin phuh.

Pôa Phạm Minh Chính, Ngế pro xiâm hnê ngăn tơnêi têa ƀă pôa Joko Widodo, Kăn xiâm pơkuâ kong têa Indonesia ai roh trâm mâ tơpui tơno.

Pôa Phạm Minh Chính kheăn kơdeăn mâu  tơdroăng mơ-eăm dêi kong têa Indonesia tung  tơdroăng tơplâ mơdât Covid 19 ƀă loi tơngah Indonesia  kô tơkâ hluâ mâu  tơdroăng pá puât; mơdât pơreăng tơtro ƀă mơnhông mơdêk cheăng kâ – rêh ối pơlê pơla; tơmiêt troh  tơdroăng pêi pro ‘’Troăng tơmiêt pêi la ngiâ Indonesia 2045’’. Pôa Phạm Minh Chính tơpui tối ƀă pôa Joko Widodo mâu  tơdroăng kân ‘na ki châ tơƀrê Hneăng hôp Đảng lâp tơnêi têa roh má 13 dêi Việt Nam, mâu troăng tơmiêt pêi xiâm dêi Pơkâ mơnhông hneăng hơnăm 2021 – 2025 ƀă tơmiêt pêi troh hơnăm 2030 – 2045 dêi Việt Nam.

A Sa Ly tơplôu ƀă tơbleăng