VOV4.Sêdang - Hâi lơ 5/5, a Hà Nội, pôa Phạm Minh Chính, Ngế pro xiâm hnê ngăn tơnêi têa hiăng pơkuâ po rôh hôp Chin phuh tiah hmâ khế 4/2021. Kố cho rôh hôp Chin phuh tiah hmâ ki apoăng klêi kơ’nâi Chin phuh séa ngăn mâu ngế cheăng. A rôh hôp Chin phuh tiah hmâ khế 4/2021, Chin phuh tơkŭm tơpui ‘na 8 tơdroăng ki kal, tung mê, ai tá mâu tơdroăng dế ôh tá tơniăn achê kố tung hnoăng cheăng hbrâ mơdât pơreăng COVID-19 drêng pơreăng rế hía rế ôh tá tơniăn, hlo rế ‘mêi ƀă pá vâ ‘nâi hdrối, hên kong pơlê hiăng ai hên mâu ngế ki tâ tung pơlê pơla.

Tơdrêng amê, Chin phuh tơpui ‘na hnoăng cheăng hbrâ ăm rôh tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn rêm râ hơnăm 2021 – 2026, rak tơniăn tơkŭm po tơƀrê tơdroăng cheăng kal kí tung khế kố. Xuân a rôh hôp, Chin phuh kô tơmâng ƀă tơpui tơno ‘na tơdroăng cheăng kâ rêh ối pơlê pơla khế 4, 4 khế apoăng hơnăm 2021 ƀă mâu tơdroăng kal ki ê.

Katarina Nga tơplôu ƀă tơbleăng