VOV4.Sedang - Pôa Phạm Minh Chính, Ngế pro xiâm hnê ngăn tơnêi têa mơgêi hneăng veăng hôp mâu kăn xiâm ASEAN. Tung pơla 2 hâi dêi hneăng lăm hôp, pôa hiăng veăng hôp ƀă ai ƀai pơchuât tối tơdroăng hnê khĕ dêi mâu kăn ASEAN ‘na tơdroăng tung kong têa Myanmar  ƀă hnoăng cheăng dêi ASEAN. Ngế pro xiâm hnê ngăn tơnêi têa tối kong têa ki cheăng tung khu ƀă dế bro Kăn hnê ngăn Hô̆i đong Khu lâp kong têa tung khế 4/2021, Việt Nam hiăng mơ-eăm pro tơ’lêi hlâu ăm tơdroăng tí tăng troăng hơlâ tơtro ăm tơdroăng Myanmar.

Ngế pro xiâm hnê ngăn pâ thế mâu kong têa tung ASEAN tơrŭm krá ƀă mâu hneăng hôp dêi Khu lâp kong têa rơtế ƀă Việt Nam mơhnhôk mâu ngế veăng kum ƀă kơjo kum ki mơ-eăm dêi ASEAN tung pêi pro tơdroăng tí tăng troăng hơlâ tơtro ăm kong têa Myanmar.

Tung 2 hâi pêi cheăng a kong têa Indonesia, Ngế pro xiâm hnê ngăn tơnêi têa xuân hiăng ai hên mâu roh trâm mâ pơla péa pâ ƀă mâu kăn xiâm dêi ASEAN, pơtối pơtroh um ki hmâ, tơrŭm dêi mâu khu kăn nếo dêi Việt Nam troh mâu kăn dêi mâu kong têa tung kơpong.

Gương tơplôu ƀă tơbleăng