VOV4.Sêdang - Hâi lơ 19/5, pôa Phạm Minh Chính, Ngế pro xiâm hnê ngăn tơnêi têa hiăng pêi cheăng ƀă Khu xiâm ngăn cheăng pêi mố đô̆i rong ƀă pơlê pơla. Tơpui a rôh pêi cheăng, pôa Phạm Minh Chính tối nhên, tơdroăng pơkâ thế khŏm pêi pro cho tơdroăng mơnhông cheăng kâ rơtế ƀă ki rơkê plĕng ƀă tơdâng tung rêh ối pơlê pơla, ôh tá xê to vâ mơ-eăm “pêi kơhnâ ki rơkê plĕng”, mê cho ƀă athế rak vế tơdâng tơ’mô rêh ối pơlê pơla vâ kơtâu tiô ki mơnhông tơ-ƀrê tung cheăng kâ, tơmâng khât tâ nếo kơ mâu ki kơtiê, mâu ki xơpá tung rêh ối.

Ngế pro xiâm hnê ngăn tơnêi têa xuân tối nhên, Khu xiâm ối ai mâu khu tơdroăng cheăng pêi ki hâi pêi tro. Tơdroăng tê mơdró tăng mơngế pêi cheăng châ mơnhông tơdâng tơ‘mô, hâi tơƀrê tiô tuá nếo, ôh tá môi tiah, ôh tá tơmot tơlo ki tơtrro. Ki tơƀrê dêi tơdroăng cheăng pêi dêi mơngế Việt Nam ối iâ, tơdroăng kố cho ing hên tơdroăng, la tung mê ai hnoăng cheăng dêi Khu xiâm, malối tung tơdroăng hnê cheăng pêi xua kuăn mơngế ki rơkê, tuăn ngôa rơkê, ‘nâi hriăn pêi cheăng, kŏng pêi rơkê cho ki xiâm vâ pơkâ tung mơnhông mơdêk tơdroăng cheăng pêi vâ châ tơ-ƀrê.

Ngế pro xiâm hnê ngăn tơnêi têa thế Khu xiâm ngăn cheăng pêi- Mố đô̆i rong ƀă pơlê pơla pơtối pêi tro mâu hnoăng cheăng, hnoăng pơkuâ pêi ki châ pơcháu, tung mê, tơkŭm mơgêi tơdroăng cheăng tiô pơkâ kơxô̆ 42/NQ-CP ‘na mâu tơdroăng kơjo kum kuăn pơlê ki trâm pá xua pơreăng COVID-19, tối mâu troăng hơlâ tơtro ăm tung la ngiâ.

Gương tơplôu ƀă tơbleăng