VOV4.Sedang - Hâi lơ 13/5, pôa Phạm Minh Chính, Ngế pro xiâm hnê ngăn tơnêi têa pêi cheăng ƀă Pơlê kong kân Hồ Chí Minh ‘na tơdroăng cheăng kâ – rêh ối pơlê pơla pái khế apoăng hơnăm 2021 ƀă tơleăng mâu tơdroăng pâ thế dêi pơlê kong kân. Kố cho pơlê kong kân ki apoăng Ngế pro xiâm hnê ngăn Chin phuh pêi cheăng klêi kơ’nâi Chin phuh rah tŭm tơtro mơngế pêi cheăng, ăm hlo tơdroăng ki tơmâng phá tơ-ê dêi Chin phuh ƀă tơdroăng mơnhông mơdêk Pơlê kong kân Hồ Chí Minh.

Pôa Phạm Minh Chính, Ngế pro xiâm hnê ngăn tơnêi têa pêi cheăng a pơlê kong kân Hồ Chí Minh

Kăn pơkuâ Vi ƀan pơlê kong kân Hồ Chí Minh hiăng tơpui tối, pâ thế Chin phuh, Ngế pro xiâm hnê ngăn Chin phuh 5 khu tơdroăng xiâm, mê cho: mơjiâng Pơkâ nếo, teăng Pơkâ 93 dêi Chin phuh vâ ‘mâi rơnêu, tơ’nôm mâu tơdroăng xiâm ‘na klâ hên râ, klâ hên hnoăng cheăng ăm pơlê kong kân Hồ Chí Minh; tah lôi mâu tơdroăng pá puât, tơvâ tơvân tung tơdroăng pêi pro Pơkâ kơxô̆ 54 dêi Kuô̆k hô̆i; ‘na mơ’no liăn cheăng, mơjiâng pro tơmeăm khoăng iâ khế hneăng hơnăm 2021 – 2025; mâu tơdroăng pâ thế ki tơdjâk pơlê kong kơdrâm Thủ Đức ‘na troăng pơkâ pêi, troăng hơlâ ki phá tơ-ê, mơjiâng hngêi trăng troăng klông pơlê kong kơdrâm Thủ Đức; mâu tơdroăng pâ thế tơdjâk troh tơdroăng pơkuâ tíu kơdrâm kuăn pơlê rêh ối pêi cheăng dêi Pơlê kong kân Hồ Chí Minh.

A Sa Ly tơplôu ƀă tơbleăng