VOV4.Sêdang - Kơxê lơ 24/5, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa pơkuâ po rôh hôp ƀă Khu pơkuâ Chin phuh ‘na hnoăng cheăng hbrâ mơdât pơreăng COVID-19. Tơpui a rôh hôp, Ngế pro xiâm hnê ngăn tơnêi têa tối rơdêi, măng tĭng hdrối nah pơreăng ôh tá tơniăn xuân dế tâ tú tung lâp lu, malối cho a mâu kơpong cheăng ƀă kơmăi kơmok.

Ngế pro xiâm hnê ngăn tơnêi têa tơpui a rôh hôp

Chin phuh, Ngế pro xiâm hnê ngăn Chin phuh, Khu hnê mơhno cheăng tơnêi têa hbrâ mơdât pơreăng COVID-19 hiăng pơkâ thế kơtăng, châ mâu kăn pơkuâ Đảng, khu kăn pơkuâ ƀă kuăn pơlê veăng rơdêi, ƀă khŏm mơ-eăm hbrâ mơdât pơreăng. Ngế pro xiâm hnê ngăn tơnêi têa tối nhên, hnoăng cheăng hbrâ mơdât pơreăng COVID-19 châ hbrâ mơdât hiăng veăng kum tơkŭm po tơniăn rôh tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn kong pơlê rêm râ hơnăm 2021 – 2026.

Ngế pro xiâm hnê ngăn tơnêi têa pơkâ thế, kal kơdĭng liăn ngân, ôh tá hrê ơdroăng ki ôh tá kal vâ tơkŭm ăm tơdroăng ki roê vaccine, mơdêk tơlo liăn ki ê, mơjiâng khu râng liăn roê vaccine. Kăn ƀô̆, kơvâ cheăng tơnêi têa kal ai tơdroăng pơkâ mơ’no mơjiâng khu râng liăn roê vaccine tung mơhnhôk tơlo ivá rơdêi dêi tâi tâng kuăn pơlê, dêi khu mơdró kâ mâu kơ koan, tíu pêi cheăng, kong pơlê, dêi mâu ngế krê, khu ki ai hiâm mơno tŏng kum tung tơbleăng tơdrăng ‘na tơdroăng ki veăng kum,’no hrê ƀă xúa.

Katarina Nga tơplôu ƀă tơbleăng