VOV4.Sedang - Kơxê lơ 28/5, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa hiăng tơdah pôa Alok Sharma, Ngế xiâm Chin phuh kong têa Ăng-glê, Kăn xiâm hnê ngăn Hneăng hôp roh má 26 rêm pâ veăng Tơdroăng tơkêa dêi Khu lâp kong têa ‘na kong prâi hơ’lêh (COP26), dế ai roh lăm pôu pêi cheăng a Việt Nam.

Ngế pro xiâm hnê ngăn tơnêi têa

A roh tơdah, péa pâ hiăng tơpui tơno mâu tơdroăng ki nhên, pơxúa, vâ pơtối djâ tơrŭm cheăng ton xŏn pơla Việt Nam – kong têa Ăng-glê mơnhông mơdêk tung pơla lâp plâi tơnêi dế trâm hên pơloăng mơnúa nêó, ki má lối cho kong prâi hơ’lêh ƀă pơreăng kân Covid 19. Ngế pro xiâm hnê ngăn tơnêi têa pơkâ thế Chin phuh Ăng-glê pơtối tŏng kum Việt Nam ‘na liăn ngân, kơmăi kơmok, túa ki rơkê tung tơdroăng pơhlêh ‘na tơdroăng cheăng kâ mơ’no iâ trếo carbon ƀă mơdêk ivá kâi trâng ƀă kong prâi hơ’lêh, ki má lối cho a mâu kơpong dế rế hiá rế tơdjâk ó dêi kong prâi hơ’lêh ƀă têa kơxĭ đik kân. Pôa Alok Sharma mơnhên kong têa Ăng-glê kô pơtối tŏng kum ăm Việt Nam tung hbrâ ví kong prâi hơ’lêh, tá thăm pêi pro rĕng tơdroăng mơnhông mơdêk ‘na kơvâ on tơhrik ki krúa lĕm.

A Sa Ly tơplôu ƀă tơbleăng