VOV4.Sêdang - Kơxo hâi lơ 25/5, pôa Phạm Minh Chính, Ngế pro xiâm hnê ngăn tơnêi têa hiăng tơpui phôn ƀă pôa Scott Morrison, Ngế pro xiâm hnê ngăn kong têa Australia. A roh tơpui tơno, pôa Phạm Minh Chính mơnhên hbrâ rơnáu tơrŭm krá tơniăn ƀă Ngế pro xiâm hnê ngăn kong têa Australia vâ djâ tơrŭm cheăng ton xŏn Việt Nam – Autralia rế hía rế châ tơƀrê, trâu hơngế ƀă tơtro má môi. 

Pôa Phạm Minh Chính, Ngế pro xiâm hnê ngăn tơnêi têa tơpui phôn ƀă Ngế pro xiâm hnê ngăn kong têa Australia

Péa Ngế pro xiâm hnê ngăn tơnêi têa môi tuăn kal pơkâ hên tâ mê nếo tung kơdo mơ-eăm mơdêk mơ’no liăn cheăng, tê mơdró pơla péa pâ, la ngiâ mơnhông krá tơniăn klêi kơ’nâi pơreăng kân, pêi rĕng kêi đeăng tâi tâng ƀă kĭ tơkêa troăng pêi ton xŏn thăm tơrŭm cheăng kâ, thăm tơrŭm cheăng khoa hok, cheăng kơmăi kơmok, pêi pro châ tơƀrê “Tơdroăng tơrŭm cheăng pơ’lêh nếo Việt Nam – Australia hneăng hơnăm 2022 – 2025’’.

‘Na tơdroăng têa kơxĭ Biển Đông, péa kăn xiâm pơkuâ mơnhên ki kal dêi tơdroăng pơtối rak hơniâp lĕm, tơniăn, gâk kring, tơniăn ƀă tơ’lêi hlâu pơto tơmeăm troăng têa kơxĭ ƀă troăng tơƀai, tơleăng ƀă troăng hơniâp lĕm mâu tơdroăng tơxup tơbriât tiô luât lâp plâi tơnêi.

A Sa Ly tơplôu ƀă tơbleăng