VOV4.Sêdang - Hâi lơ 4/6, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh hiăng tơpui phôn ƀă pôa Lý Khắc Cường, Ngế pro xiâm hnê ngăn kong têa Sinuâ. A roh tơpui phôn, péa Ngế pro xiâm hnê ngăn tơnêi têa hiăng tơpui ‘na hên tơdroăng xiâm ki pơxúa thăm mơnhông, loi tơngah tơdroăng kal kí; kum dêi pó mâu tơdroăng pá puât, tơ’lêi hlâu, túa ki rơkê tơtro ƀă rơtế tơpui mâu troăng thăm tơrŭm cheăng péa tơnêi têa tung la ngiâ.

Pôa Phạm Minh Chính, Ngế pro xiâm hnê ngăn tơnêi têa tơpui phôn ƀă Ngế pro xiâm hnê ngăn kong têa Sinuâ 

Pôa Lý Khắc Cường rơkâu Đảng Kŏng san Việt Nam tơkŭm po châ tơƀrê Hneăng hôp má XIII ƀă mâu tơdroăng châ tơƀrê ki Việt Nam châ tơƀrê tung mơnhông mơdêk cheăng kâ – rêh ối pơlê pơla ƀă hbrâ mơdât COVID 19; mơnhên Đảng, Chin phuh ƀă kuăn pơlê Sinuâ nhuô̆m tơrŭm ƀă Việt Nam, hbrâ rơnáu pơtối djâ tơrŭm cheăng pơla Việt Nam – Sinuâ mơnhông mơdêk trâu hơngế, djâ pơxúa ăm kuăn pơlê péa tơnêi têa; pói vâ thăm tơpui tơno pơla péa tơnêi têa rĕng châ tơƀrê, hbrâ rơnáu rơtế Việt Nam ƀă mâu kong têa ASEAN pơtối mơ-eăm rĕng châ COC.

A Sa Ly tơplôu ƀă tơbleăng