VOV4.Sedang - Tối tơbleăng a Hneăng hôp tơpui mâu tơdroăng tung la ngiâ dêi châu Á xua Nikkei tơkŭm po a hâi lơ 20/5/2021 tiô tơdroăng mơ’no tơdrêng, pôa Phạm Minh Chính, Ngế pro xiâm hnê ngăn tơnêi têa tối nhên, môi châu Á mơ-eăm xua vâ pro hơniâp lĕm tơniăn mơnhông tơ-ƀrê cho tơdroăng púi vâ tơchoâm dêi mâu kong têa tung kơpong, oh tá pơrah dêi rơpó pơla mâu kong têa, mơ-eăm dêi mâu Chin phuh, tơdroăng tơrŭm dêi rơpó cho khuă ki vâ lôu peá vâ mơjiâng tung la ngiâ tơniăn lĕm ăm châu Á.

Châ pơxiâm mơjiâng a hơnăm 1995, Hneăng hôp lâp plâi tơnêi tơpui tơdroăng tung la ngiâ châu Á cho môi tung mâu hneăng hôp tiah hmâ nhoăm tơngah má môi a châu Á xiâm Grup Nikkei dêi Nhuk pơkuâ tơkŭm po. Hneăng hôp tơ’mot hên ngế rơhêng vâ ‘nâi plĕng  ƀă veăng hôp ai hên mâu kăn xiâm, mâu tơmối ki krếo lăm troh, mâu ngế ki rơkê, mâu khu mơdró dêi mâu kong têa  kơpong châu Á xuân môi tuăn teăng mâ mâu grup cheăng kâ kân tung lâp plâi tơnêi.

A hneăng hôp, mâu kăn tơpui hên tơdroăng tung kơpong, hneăng cheăng ƀă ki ‘na tơmeăm khoăng ai hlâu vâ mơnhông dêi châu Á tung kơtâ um kơchuâ mơhno ăm lâp plâi tơnêi ƀă mâu troăng hơlâ ki vâ mơdêk dêi kơpong ƀă tơdroăng pơxá: “ ‘Mâi mơnhông klêi kơ’nâi kâi mơdât pơreăng kân COVID’’, hnoăng cheăng dêi châu Á ƀă tơdroăng ‘mâi mơnhông lâp plâi tơnêi”.

Tơpui a hneăng hôp, pôa Phạm Minh Chính, Ngế pro xiâm hnê ngăn tơnêi têa tối, Việt Nam veăng ai hnoăng pêi hbrâ rơtế ƀă mâu kong têa mơ-eăm pro hơniâp lĕm ƀă hlối tơrŭm môi tuăn dêi rơpó xua vâ pro pơxúa tơchoâm mơnhông dêi tơrêm to kong têa tung kơpong xua tơtô ƀă hơniâp dêi rêm ngế kuăn pơlê tung lâp plâi tơnêi.

Gương tơplôu ƀă tơbleăng