VOV4.Sêdang - Khu pơkuâ râng kơxô̆ liăn hbrâ mơdât COVID 19 hiăng tơbleăng mơhno ngiâ ƀă pơkâ mơhnhôk pơlê pơla tơdjuôm ivá môi tuăn ƀă Chin phuh vâ ai vaccine rĕng má môi pâk ăm kuăn pơlê. Xông tơpui a leh tơbleăng mơhno ngiâ pôa Phạm Minh Chính hiăng tối: “Kố cho kơxô̆ liăn tuăn pâ, dêi hiâm mơno tơrŭm môi tuăn, dêi tơdroăng loi tơngah, dêi plâi nuih tơdjêp plâi nuih vâ pin rơtế dêi pó tơkâ hluâ pá puât, kum mơjiâng môi Việt Nam ƀlêi trâng’’.

Pôa Phạm Minh Chính, Ngế pro xiâm hnê ngăn tơnêi têa veăng leh mơhno ngiâ Khu pơkuâ râng kơxô̆ liăn rôe vaccine hbrâ mơdât COVID 19

Tiô tơdâng kơxô̆ liăn vâ rôe ƀă pâk ăm 75 rơtuh kuăn pơlê, Việt Nam kal 150 rơtuh klŏng pơkeăng vaccine, ƀă kơxô̆ liăn lối 25 rơpâu rơtal liăn. Xua mê, vâ ai tŭm kơxô̆ liăn hbrâ mơdât COVID 19 vâ krếo thế kuăn pơlê, mâu lêng lâp tơnêi têa, kuăn pơlê pin ki rêh ối pêi cheăng a kong têa ê, mâu khu tê mơdró, ngế tê mơdró, tâi tâng khu tơrŭm cheăng, ngế krê tung tơnêi têa ƀă a kong têa ê veăng tơlo liăn, tŏng kum liăn ăm Khu râng liăn kơdĭng rôe vaccine hbrâ mơdât COVID 19 ƀă hiâm mơno pôu râng hnoăng cheăng xua ivá pơlê pơla rêm ngế, xua pơlê pơla, xua tơnêi têa, hdroâng mơngế ƀă hiâm mơno rŭm môi tuăn lâp plâi tơnêi, tơdjuôm ivá troh tah pơreăng kân COVID 19.

A Sa Ly tơplôu ƀă tơbleăng