VOV4.Sedang - Kơxo lơ 23/5, a kơpong tâ phĭu kơxô̆ 18, bêng Cái Khế, pơlê kân Ninh Kiều, Pơlê kong kân Cần Thơ, pôa Phạm Minh Chính, Ngế pro xiâm hnê ngăn tơnêi têa rơtế khu râ kăn pơkuâ Pơlê kong kân Cần Thơ ƀă kơdrâm kuăn pơlê hiăng veăng leh pơxiâm po ƀă tâ phĭu rah xo kăn teăng mâ Kuô̆k hô̆i hneăng má XV ƀă kăn teăng mâ Hô̆i đong kuăn pơlê mâu râ, hneăng hơnăm 2021 – 2026.

Pôa Phạm Minh Chính, Ngế pro xiâm hnê ngăn tơnêi têa lăm tâ phĭu

Tiô Ngế pro xiâm hnê ngăn Chin phuh – ngế ối a ko kơ koan mơjiâng luât, tơdroăng rah xo mâu ngế teăng mâ kơ koan ai hnoăng kân má môi dêi tơnêi têa châ mơhno tung tơdroăng pin hiăng tơkŭm po tâ phĭu kuăn pơlê pơkuâ dêi hnoăng cheăng, tơdrăng lĕm, ôh tá tơdjâk pakong, tơdâng tơ’mô vâ rêm ngế kuăn pơlê tâ phĭu mơhno hnoăng kuăn pơlê dêi tơná, rah xo mâu kăn teăng mâ ki tơxâng má môi tung mâu kơ koan ai hnoăng kân dêi kong pơlê ƀă kơ koan ai hnoăng kân má môi cho Kuô̆k hô̆i hneăng má XV.

Ahdrối veăng tâ phĭu, mâu kăn teăng mâ ƀă kuăn pơlê tâ phĭu xuân pêi pro kơtăng troăng hbrâ mơdât COVID 19 môi tiah tối ‘na ivá châ chăn ăm ƀok thái pơkeăng, xếo kŏng ƀă trếo têa pơkeăng kơdê pơreăng, klup rơkong môh, ối kơtăn hơngế.

          A Sa Ly tơplôu ƀă tơbleăng