VOV4.Sêdang - Hâi lơ 17/5, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa  hiăng krếo phôn tơpui ƀă pôa Yoshihide Suga, Ngế pro xiâm hnê ngăn kong têa Nhuk. Tung chôu phut tơpui tơno tơrŭm cheăng, loi nhoăm dêi rơpó ƀă tơrŭm, péa Ngế pro xiâm hnê ngăn tơnêi têa khĕn kơdeăn khât tơrŭm cheăng pơla Việt Nam Nhuk hiăng ƀă dế mơnhông tơ-ƀrê tơniăn, hlối tơpui ‘na mâu tơdroăng pêi pro nhên khât tung tơrŭm cheăng pơla Việt Nam ƀă Nhuk hiăng ƀă dế mơnhông tơ-ƀrê tơniăn trâu rơdâ pơla Việt Nam - Nhuk tung la ngiâ.

Pôa Phạm Minh Chính, Ngế pro xiâm hnê ngăn tơpui phôn ƀă Ngế pro xiâm hnê ngăn kong têa Nhuk

Péa Ngế pro xiâm hnê ngăn tơnêi têa vâ môi tuăn mơdêk tơpui tơno pơla mâu khu xiâm, kơvâ cheăng, kong pơlê, tơrŭm krá vâ tơleăng mơnhên mâu tơdroăng tung tơrŭm pơla péa tơnêi têa; tơkŭm pêi mâu tơdroăng troh leh tơbâ 50 hơnăm mơjiâng tơrŭm cheăng pơla Việt Nam - Nhuk a hơnăm 2023 tơxâng ƀă tơdroăng tơrŭm pơla péa tơnêi têa.

Péa Ngế pro xiâm xuân tơpui tơno ƀă dêi rơpó mâu tơdroăng tung kơpong ƀă lâp plâi tơnêi rơtế vâ ‘nâi plĕng, tung mê, ai tơdroăng ‘na Biển Đông; môi tuăn pơtối tơrŭm krá tung hên tơdroăng, malối a Khu lâp kong têa ƀă ASEAN.

Gương tơplôu ƀă tơbleăng