VOV4.Sêdang -  Klăng roh pôa Phạm Minh Chính, Ngế pro xiâm hnê ngăn tơnêi têa châ rah xo to pro Ngế pro xiâm hnê ngăn tơnêi têa Kŏng hoa xah hô̆i chuh ngiah Việt Nam, hâi lơ 20/4, pôa Lý Hiển Long, Ngế pro xiâm hnê ngăn kong têa Singapore hiăng krếo phôn rơkâu. Pôa Phạm Minh Chính mơnê Ngế pro xiâm hnê ngăn kong têa Singapore hiăng pơtroh kơthô ƀă krếo phôn rơkâu, mơhno tơdroăng pói vâ tơrŭm krá tơniăn ƀă pôa Lý Hiển Long vâ thăm tơrŭm tâ mê nếo Tơrŭm cheăng ton xŏn Việt Nam – Singapore tung tâi tâng mâu kơvâ cheăng.

Péa Ngế pro xiâm hnê ngăn tơnêi têa tối phiu ro mâu tơdroăng ki mơnhông tơtêk hôm tung tơrŭm cheăng pơla péa pâ, mơhé ai mâu tơdroăng pá puât xua pơreăng COVID 19 pro.

Pôa Phạm Minh Chính, Ngế pro xiâm hnê ngăn tơnêi têa tơpui phôn ƀă pôa Lý Hiển Long, Ngế pro xiâm hnê ngăn kong têa Singapore

Péa ngế pro xiâm hnê ngăn tơnêi têa môi tuăn thăm tơrŭm cheăng tung mâu kơvâ cheăng ki péa pâ ai tơmeăm mơnhông tơtêk môi tiah liăn ngân, kŏng ngê̆ thông tin, kế tơmeăm khoăng pêi lo ing chiâk deăng, ká xi xŏng, hnê hriâm ƀă hnê mơjiâng tuăn ngôa rơkê, mơjiâng hngêi trăng, troăng klông ƀă hía hé, po rơdâ troh mâu kơvâ tơxâng tiô pơkâ dêi rơxông hơ’leh ‘na kơmăi kơmok roh má 4 môi tiah mơjiâng on tơhrik krúa lĕm, tíu kuăn pơlê reh ối pêi cheăng rơkê, hơ’leh nếo rơkê, cheăng kâ xúa kơmăi kơmok; hnê mơhno dêi pó túa ki rơkê tơtro tung pơkuâ ƀă mơnhông cheăng kâ, hnê mơjiâng mơngế pêi cheăng, ki má lối mâu ngế pêi cheăng ki rơkê chiâng cheăng.

A Sa Ly tơplôu ƀă tơbleăng