VOV4.Sêdang -  Hâi lơ 9/6, pôa Phạm S – Kăn phŏ hnê ngăn Vi ƀan kong pơlê Lâm Đồng hiăng séa ngăn tơdroăng hbrâ mơdât Covid 19 tung mâu tơring Đức Trọng, Lâm Hà. A tơring Đức Trọng, khu râ kăn hiăng lăm pôu, séa ngăn mâu tíu mơdât pơreăng Covid 19 pro a Tơraih tơƀai Liên Khương, pơlê kân Liên Nghĩa ƀă a troăng kân lăm ngi kong pơlê ki ê kơxô̆ 28B, tơkăng ƀă Bình Thuận, cheăm Ninh Loan.

Klêi kơ’nâi séa ngăn, pôa Phạm S hiăng mơnhên tơdroăng gak dêi mâu khu cheăng a mâu tíu gak tât pơreăng cho kơtăng, pêi tá hiâm mơno ƀă pro tơ’lêi hlâu hnê mơhno kuăn pơlê tối ăm ƀok thái pơkeăng vâ khăm ngăn hbrâ mơdât Covid 19 drêng tơkâ mâu tíu gak tât pơreăng.

A tơring Lâm Hà, tiô tơbleăng dêi khu râ kăn pơkuâ tơring, tơdroăng hbrâ mơdât pơreăng Covid 19 tung tơring hiăng châ pêi pro kơtăng ƀă kơtăng tiô mâu mơ-éa hnê mơhno dêi tơnêi têa, kong pơlê. Pôa Phạm S pơkâ thế tơring Lâm Hà pơtối pêi pro tiô mơ-éa hnê mơhno nếo má môi dêi Tơnêi têa, kong pơlê; tung mê, ai mâu tơdroăng ki nếo ‘na kơpong klâ kơtăn tiô pơkâ 15 ƀă kơpong klâ kơtăn tiô pơkâ 16 xua mê tơring, cheăm rơtế rơhêng vâ ‘nâi plĕng.

A Sa Ly tơplôu ƀă tơbleăng