VOV4.Sêdang - A Hà Nội, Đăi tươ̆ng Tô Lâm, kăn xiâm ngăn Kŏng an hiăng ai rôh tơdah pôa Daniel Kritenbrink, kăn teăng mâ Mih a Việt Nam troh koh hmât pơlâng mơgêi hnoăng cheăng a Việt Nam. Pôa Tô Lâm rơkâu kơ pôa Daniel Kritenbrink hiăng pêi klêi dêi hnoăng cheăng a Việt Nam ƀă châ kăn xiâm pơkuâ kong têa Mih pôk pro ngế kum cheăng tơpui kâ kong têa Mih pơkuâ ‘na Đông Á – Thái Bình Dương.

Pôa Tô Lâm mơnê pôa Daniel Kritenbrink ƀă tối rơdêi, Việt Nam rơhêng vâ pơtối mơdêk tơrŭm cheăng tâi tâng ƀă Mih tung tơdroăng ki loi nhuô̆m tơniăn krê, pơkuâ, tâi tâng tơnêi tơníu, xua ki pơxúa ăm kuăn pơlê péa tơnêi têa, veăng kum rak vế hơniâp lĕm, tơniăn tơnêng, tơrŭm ƀă mơnhông mơdêk tung kơpong ƀă tung lâp plâi tơnêi.

Pôa Tô Lâm rơhêng vâ, tung la ngiâ ah, Mih tŏng kum kuăn pơlê Việt Nam pơtối châ roê vaccine hbrâ mơdât Covid-19; tơrŭm ƀă Chin phuh Việt Nam tung hnê tối kơmăi kơmok, mơjiâng pro vaccine.

Katarina Nga tơplôu ƀă tơbleăng