VOV4.Sêdang - Klăng tĭng kân Phật đản Phật lịch 2556, dương lĭch 2021 ƀă tĭng kân tơbâ 40 hơnăm mơjiâng tơdroăng khôp Phop Việt Nam (1981 - 2021), kơxo lơ 19/5, a Hà Nội, pôa Trần Thanh Mẫn, Kăn cheăng tung Khu xiâm kal kí, Kăn xiâm phŏ hnê ngăn Kuô̆k hô̆i hiăng troh lăm pôu, rơkâu ƀok Phop Thích Thanh Nhiễu, Kăn phŏ hnê ngăn Hô̆i đong pơkuâ tơdroăng khôp Phop Việt Nam, rơtế Ƀơrô 1 ối tung Khu xiâm pơkuâ tơdroăng khôp Phop Việt Nam.

Teăng mâ khu râ kăn pơkuâ Đảng ƀă Tơnêi têa, pôa Trần Thanh Mẫn pơtroh tâi tâng mâu ƀok phop, jâ phop, kuăn khôp phop Việt Nam mâu rơkong rơkâu lĕm má môi; rơkâu khu xiâm pơkuâ khôp Phop Việt Nam tơdah môi tĭng kân Phật đản phiu ro, pêng păm tơdroăng lĕm ro ƀă đi đo tơrŭm môi tuăn tung tâi tâng hdroâng mơngế.

Tung mê ai tối nhên, tơdroăng pơreăng COVID 19 dế xông tâ tú ƀă pơreăng tâ tú ó tro roh tâ phĭu rah xo kăn teăng mâ Kuô̆k hô̆i ƀă kăn teăng mâ Hô̆i đong hnê ngăn kuăn pơlê rêm râ, pôa Trần Thanh Mẫn pói vâ Khu pơkuâ khôp Phop Việt Nam mơhnhôk kuăn khôp phop, kuăn pơlê veăng lăm tâ phĭu tơniăn, châ tơƀrê; tơdrêng amê, pói tơngah mâu ƀok phop cho mâu ngế tơbriât to pro kăn teăng mâ Kuô̆k hô̆i hneăng má 15 ƀă kăn teăng mâ Hô̆i đong kuăn pơlê rêm râ hneăng hơnăm 2021 – 2026, châ rah xo kô ai rơkong tơpui, tối mâu tơdroăng tơmiât, pói vâ dêi kuăn pơlê troh ƀă Đảng ƀă Tơnêi têa.

A Sa Ly tơplôu ƀă tơbleăng