VOV4.Sêdang - Klêi kơ’nâi pơkâ klâ kơtăn pơlê pơla lâp Pơlê kong kân Hồ Chí Minh tiô pơkâ 15 ƀă kơpong pơlê kân Gò Vấp, bêng Thạnh Lộc dêi pơlê kân 12 tiô pơkâ 16 dêi Ngế pro xiâm hnê ngăn Chin phuh, mê a kơxo lơ 31/5, pôa Trương Hòa Bình, Ngế pro xiâm phŏ hnê ngăn hiăng lăm séa ngăn tơdroăng hbrâ mơdât pơreăng COVID 19 tung pơlê kong kân. Pôa Trương Hòa Bình hiăng lăm séa ngăn tơdroăng hbrâ mơdât pơreăng a 3 kŏng ti ối tung kơpong mơjiâng pro tơmeăm khoăng Tân Thuận, pơlê kân 7 ai: Kŏng ti pêi cheăng tiô rơnó môi khu MTex Việt Nam, Kŏng ti pêi cheăng tiô rơnó môi khu Kim May Organ Việt Nam ƀă Kŏng ti pêi cheăng tiô rơnó môi khu Nikkiso Việt Nam.

Pôa Trương Hòa Bình, Ngế pro xiâm phŏ hnê ngăn tơnêi têa tơpui tơno ƀă kŏng nhân

Klêi kơ’nâi séa ngăn nhên a 3 khu tê mơdró tung kơpong mơjiâng pro kế tơmeăm khoăng Tân Thuận, Ngế pro xiâm phŏ hnê ngăn tơnêi têa rơtế ƀă khu râ kăn pơtối séa ngăn tơdroăng hbrâ mơdât pơreăng a kơpong klâ kơtăn Hngêi ăm sinh viên ối Đăi hok Tơnêi têa pơlê kong kân Hồ Chí Minh. Kố cho môi tung mâu hngêi ăm sinh viên ối ki kân rơdâ má môi dêi mâu hngêi trung Đăi hok, kao đăng tung pơlê kong kân châ Vi ƀan Pơlê kong kân Hồ Chí Minh vâ vêh mơjiâng mâu kơpong klâ kơtăn hbrâ ăm mâu ngế trâm mâ ối achê ƀă mơngế tro tâ virus SARS-CoV2.

A Sa Ly tơplôu ƀă tơbleăng