VOV4.Sêdang - Kơxo lơ 26/4, Vi ƀan tâ phĭu a Pơlê kong kân Đà Nẵng tơkŭm po roh hôp má 4 môi tuăn chêh inâi mâu kăn tơbriât to pro kăn teăng mâ Kuô̆k hô̆i hneăng má XV ƀă Hô̆i đong pơlê kong kân hneăng hơnăm 2021 – 2026; pêi pro pơkâ trâm mâ kuăn pơlê dêi mâu kăn ki tơbriât to pro kăn teăng mâ Kuô̆k hô̆i ƀă Hô̆i đong pơlê kong kân. Pôa Võ Văn Thưởng, Kăn cheăng tung Khu xiâm kal kí, Kăn pơkuâ hnê ngăn cheăng Đảng châ Tơnêi têa tơbleăng tơbriât to pro kăn teăng mâ Kuô̆k hô̆i a pơlê kong kân Đà Nẵng.

Vi ƀan tâ phĭu Pơlê kong kân Đà Nẵng tơkŭm po roh hôp má 4

A hneăng hôp, mâu kăn teăng mâ hiăng môi tuăn chêh inâi mâu kăn tơbriât to pro kăn teăng mâ Kuô̆k hô̆i hneăng má XV ƀă Hôi đong kuăn pơlê hneăng hơnăm 2021 – 2026 tiô rêm tíu tâ phĭu. Pơtối mê, Pơlê kong kân Đà Nẵng ai 10 ngế kăn tơbriât to pro kăn teăng mâ Kuô̆k hô̆i hneăng má XV, tung mê, 2 ngế tơbriât to pro kăn xua Tơnêi têa tơbleăng cho pôa Võ Văn Thưởng, Kăn cheăng tung Khu xiâm kal kí, Kăn pơkuâ hnê ngăn Đảng ƀă jâ Nguyễn Thị Kim Thúy, Kăn pêi cheăng tung Vi ƀan mâu tơdroăng pơlê pơla dêi Kuô̆k hô̆i.

A Sa Ly tơplôu ƀă tơbleăng