VOV4.Sêdang - Kơxo lơ 12/5, pôa Vũ Đức Đam, Ngế pro xiâm phŏ hnê ngăn tơnêi têa, Kăn pơkuâ hnê mơhno tơnêi têa hbrâ mơdât pơreăng COVID 19 hiăng pơkuâ roh hôp thâ mơ’no tơdrêng tung um tơvi pơla Khu râ kăn ai mâ đi đo Khu hnê mơhno tơnêi têa ƀă 3 kong pơlê Đà Nẵng, Bắc Ninh, Bắc Giang klêi kơ’nâi châ hlo lối 100 ngế tro tâ COVID 19 cho kŏng nhân a mâu kơpong hngêi kơmăi kơmok.

Ngế pro xiâm phŏ hnê ngăn tơnêi têa pơchân tối Đà Nẵng, Bắc Ninh, Bắc Giang pơtối rak vế hnoăng pêi kâ, rế hbrâ mơdât pơreăng châ tơƀrê; pơreăng xông tâ tú troh alâi ƀă pêi pro klâ kơtăn athế kơtăng, rak tơniăn ôh tá ăm pơreăng xông tâ tú dêi pó tung kơpong klâ kơtăn.

Tíu pêi cheăng tung mâu hngêi kơmăi kơmok cho tíu ki kí, kơdrâm mơngế xua mê, pơreăng tơ’lêi tâ tú. Ngế pro xiâm phŏ hnê ngăn tơnêi têa xuân pơchân mâu kong pơlê, pơlê kong kơdrâm ôh tá tơngôu, kal mơhnhôk tá khu cheăng kal kí veăng pêi, ôh tá lôi tơdroăng hbrâ mơdât pơreăng ăm kơvâ khăm pơlât.

A Sa Ly tơplôu ƀă tơbleăng