VOV4.Sêdang - Kơxê lơ 4/6, a Tíu pêi cheăng Chin phuh, pôa Vũ Đức Đam, Ngế pro xiâm phŏ hnê ngăn tơnêi têa, Kăn pơkuâ Hnê mơhno Tơnêi têa ‘na hbrâ mơdât COVID 19 hôp mơ’mo tơdrêng tung um tơvi ƀă khu râ kăn pơkuâ kong pơlê Bắc Ninh ƀă Bắc Giang ‘na troăng hbrâ mơdât pơreăng COVID 19 tung nôkố. Tối nhên tơdroăng tung môi kơpong klâ kơtăn, mơdât ôh tá ăm mot kơpong ai pơreăng, thôn cheăm pakong kơtăng, tung mê, pro pơhôi, pôa Vũ Đức Đam, Ngế pro xiâm phŏ hnê ngăn tơnêi têa pơkâ thế, mâu kong pơlê kal pơ’lêh tơdroăng kố.

Pakĭng mê, kal pơtối mơdât tung pơlê pơla, hlối pêi tơdroăng xo mơheăm vâ khăm ngăn a mâu kơpong, xúa mâu phân mêm tối tơbleăng ăm ƀok thái pơkeăng vâ ti tăng mâu ngế tro tâ pơreăng. Mâu hâi hiăng hluâ, kơmăi ki khăm ngăn, hiăng châ hlo lối 500 ngế nhôm tro tâ vâ xo mơ-eăm khăm ngăn. Pôa Vũ Đức Đam tối, kong pơlê Bắc Ninh ƀă Bắc Giang pơkâ mơ’no mâu troăng xing xoăng tíu pêi cheăng ƀă ôu kâ a khu tê mơdró, kố cho troăng pêi ki pơtân, kal rĕng ai troăng pêi krá tơniăn tâ.

A Sa Ly tơplôu ƀă tơbleăng