VOV4.Sêdang - Kơxo lơ 26/3, a Hngêi trung hnê ‘na ngăn pơkeăng – khăm pơlât khu lêng (ối tung Khu xiâm pơkuâ lêng), pôa Vũ Đức Đam, Ngế pro xiâm phŏ hnê ngăn tơnêi têa, Kăn pơkuâ hnê mơhno Tơnêi têa hbrâ mơdât pơreăng Covid 19 troh lăm pôu ƀă mơhnhôk khu ki veăng hriăn plĕng ƀă mâu ngế ki pleăng mơnúa pâk trum má 2, hneăng má 2 Vaccine Nano Covax. Tiô yăo sư, Tiê̆n sih Đỗ Quyết, Kăn pơkuâ hngêi trung hnê ‘na ngăn pơkeăng – khăm pơlât khu lêng tối, troh nôkố, hâi khế hriăn plĕng, mơjiâng pro vaccine Nano Covax hiăng kơdroh hâi khế iâ má môi laga xuân tơniăn tiô khoa hok vâ pơkâ rĕng má môi ai vaccine tơniăn, châ tơƀrê ăm mơngế Việt Nam.

Roh mơnúa vaccine hbrâ mơdât Covid 19 Nano Covax hneăng má 2 ai 560 ngế pleăng kĭ mơnúa pâk, po rơdâ mơngế sap ing 18 troh 60 hơnăm, tung mê, ai ngế ai tơdroăng châi laga ôh tá râ. Hneăng má 3 kô mơnúa a lối 10 rơpâu ngế, ing mê, ai xiâm kối khoa hok vâ pơchông vâ Việt Nam kô rĕng ai vaccine, tiô tối hdrối a khế 9 hơnăm kố.

A Sa Ly tơplôu ƀă tơbleăng