VOV4.Sêdang - Kơxo lơ 13/4, pôa Vương Đình Huệ, Kăn xiâm hnê ngăn Kuô̆k hô̆i, kăn xiâm hnê ngăn Hô̆i đong tâ phĭu tơnêi têa rơtế ƀă mâu kăn ki séa ngăn, tí tăng ngăn tơdroăng dêi Vi ƀan pơkuâ cheăng Kuôk hô̆i, Hô̆i đong tâ phĭu tơnêi têa séa ngăn tơdroăng cheăng hbrâ tâ phĭu rah xo  Kuô̆k hô̆i hneăng 15, kăn xiâm hnê ngăn Hô̆i đong kuăn pơlê rêm râ hneăng 2021-2026 a cheăm Kiến Thiết ƀă tơring Tiên Lãng, Pơlê kong kân Hải Phòng.

Klêi tơdroăng seá ngăn, tí tăng ngăn ƀă hmâ tối tơbleăng dêi kăn hnê ngăn cheăm Tiên Lãng, tơring Tiên Lãng, pôa Vương Đình Huệ, Kăn xiâm hnê ngăn Hô̆i đong tâ phĭu tơnêi têa pơkâ thế, Khu hnê mơhno tâ phĭu tơring, cheăm pơtối tơrŭm krá kâk vâ pêi tro hnoăng cheăng dêi tơná; Séa ngăn nhên roh má mơ’nui inâi kuăn pơlê ki veăng tâ phĭu, vâ tơniăn hnoăng rêh ối dêi kuăn pơlê, ôh tá lôi ngế ki lâi.

Tơdroăng hbrâ tâ phĭu pêi tro tiô khoa hok, tơ’lêi ăm kuăn pơlê. Pôa Vương Đình Huệ, Kăn xiâm hnê ngăn Kuô̆k hô̆i tối pơchân, tơdroăng pơreăng COVID-19 tung lâp plâi tơnêi nôkố tâ tú rơ-iô. Hô̆i đong Tâ phĭu tơnêi têa kô rĕng pơkâ tơdroăng tơkŭm tâ phĭu tâng pơreăng CoOVID-19 tâ tú rơ-iô ƀă kơlo tâ tú ki pơrá phá vâ hnê ăm mâu tơring cheăm.

Gương tơplôu ƀă tơbleăng