VOV4.Sêdang - Kơmăng lơ 2/4, a Hngêi Kuô̆k hô̆i, pô Vương Đình Huệ, Kăn xiâm hnê ngăn Kuô̆k hô̆i, krếo phôn tơpui tơno ƀă pôa Saysomphone Phomvihane, Kăn xiâm hnê ngăn Kuô̆k hô̆i Lếo Rơkâu kơ pôa Saysomphone Phomvihane  châ Kuô̆k hô̆i Lếo rah xo pro Kăn xiâm hnê ngăn Kuô̆k hô̆i Lếo hneăng 9, pôa Vương Đình Huệ, Kăn xiâm hnê ngăn Kuô̆k hô̆i  tối, Việt Nam đi đo nhoăm ƀă pêi a hdrối ‘na tơdroăng tơrŭm cheăng ki kal ƀă Lếo, ngăn mê cho tơdroăng ki ai pơxúa khât ƀă 2 tơnêi têa, hbrâ vâ tối ăm dêi rơpó mâu tơdroăng ƀă veăng môi tuăn kum dêi rơpó, tâi tâng mâu kăn ƀă kuăn pơlê Lếo tung tơdroăng mơjiâng kong têa Lếo xông tơ-ƀrê.

Pôa Vương Đình Huệ, Kăn xiâm hnê ngăn Kuô̆k hô̆i tơpui phôn ƀă Kăn xiâm hnê ngăn Kuô̆k hô̆i kong têa Lếo

Peá pâ pơtối tơkŭm po mâu hneăng hôp vâ rơtế ƀă dêi rơpó tí tăng ‘nâi plĕng mâu tơdroăng ‘na khoa hok, tơkŭm hriâm mơdêk rế rơkê tung tơdroăng cheăng pêi dêi Kăn Kuô̆k hô̆i, mâu kăn Hô̆i đong kuăn pơlê rêm râ kong pơlê ƀă mâu kăn ƀô̆ pơkuâ kơvâ cheăng dêi Kuô̆k hô̆i  Lếo. Peá pâ rơtế seá ngăn tí tăng ngăn ƀă mơhnhôk mơdêk tơrŭm cheăng kâ, malối tê mơdró, ‘no liăn cheăng, tơkŭm pêi mâu tơdroăng ki peá kâ hiăng kĭ tơhrâ ƀă hiăng tơhrâ pơla péa Chin phuh hiăng kĭ hdrối.

Gương tơplôu ƀă tơbleăng