VOV4.Sêdang - Kơxo lơ 17/5/2021, a Hngêi hôp Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i pêi cheăng ƀă Khu ngăn ‘na hiâm mơno kuăn pơlê ối tung Vi ƀan pơkuâ Kuô̆k hô̆i. Pôa Vương Đình Huệ tối nhên, hnoăng cheăng hnê tơdroăng ki rơhêng vâ cho hnoăng cheăng ki tơdah kuăn pơlê tung pơla hdrối kố nah hiăng kum Vi ƀan pơkuâ Kuô̆k hô̆i pêi pro hnoăng cheăng séa ngăn, pơkâ tơleăng pơsăm tối, pơsăm tơkêng, pâ thế dêi kuăn pơlê pêi tơƀrê mâu tơdroăng ki mơhnhôk, mơdêk hnoăng cheăng pôu râng tơpui leăng dêi mâu kơ koan, malối cho ngế ki pơkuâ xiâm ‘na mâu rôh pơsăm tối, pơsăm tơkêng, pâ thế dêi kuăn pơlê, châ kuăn pơlê veăng vâ môi tuăn; veăng kum tơƀrê tung tơdroăng tơdjuôm dêi Kuô̆k hô̆i hneăng má 14.

Pôa Vương Đình Huệ, Kăn xiâm hnê ngăn Kuô̆k hô̆i pêi cheăng ƀă Khu ngăn ‘na hiâm mơno kuăn pơlê

Tung la ngiâ ah, Khu ngăn ‘na hiâm mơno kuăn pơlê kal mơnhên hnoăng cheăng ki nếo, malối cho sap ing nôkố troh hâi tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn kuăn pơlê rêm râ hơnăm 2021 – 2026. Pôa Vương Đình Huệ tối nhên, Khu ngăn ‘na hiâm mơno kuăn pơlê kal mơjiâng tơdroăng tơkêa tâi tâng mơdêk ivá, tơƀrê tung hneăng cheăng ki nếo tung la ngiâ, pơtroh ăm Kuô̆k hô̆i hneăng má 15 vâ ăm tơdroăng pêi pro dêi Đảng đoàn Kuô̆k hô̆i tung tơdroăng ki pơtó mâu ngế cheăng ki hiăng châ pêi klêi.

Katarina Nga tơplôu ƀă tơbleăng