VOV4.Sedang - Kơxê lơ 13/5, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i tơdah tơpui tơno pôa Sengphet Houngboungnuang, Kăn teăng mâ kong têa Lếo a Việt Nam. Pôa Vương Đình Huệ rơkâu ƀă kheăn kơdeăn tơdroăng ki kong têa Lếo hiăng tơkŭm po châ tơƀrê Hneăng hôp roh má XI Đảng Kuăn pơlê  Kăch măng kong têa Lếo ƀă Hneăng hôp má môi, Kuô̆k hô̆i Lếo hneăng má IX hiăng rah xo Khu râ kăn pơkuâ hneăng nếo ai tuăn ngôa pêi cheăng rơkê, kuăn pơlê loi tơngah ƀă pơkâ hên troăng pêi ton xŏn, troăng hơlâ ki kal ăm hneăng cheăng nếo.

Pôa Vương Đình Huệ, Kăn xiâm hnê ngăn Kuô̆k hô̆i tơdah kăn teăng mâ kong têa Lếo

Pôa Vương Đình Huệ mơnhên tối, troăng hơlâ môi tuăn, hdrối kơ’nâi xuân môi tiah môi dêi Việt Nam đi đo nhuô̆m, kơjo má môi ăm tơrŭm cheăng kân, rŭm môi tuăn ki phá tơ-ê ƀă tơrŭm tŭm têk pơla Việt Nam ƀă Lếo.

Kăn teăng mâ Lếo a Việt Nam mơnê pôa Vương Đình Huệ hiăng mơdoh chôu phut tơdah; tối loi tơngah, ing pơkuâ dêi péa tơnêi têa, tơrŭm cheăng pơla péa pâ, rŭm môi tuăn ki phá tơ-ê, tơrŭm tŭm têk kô rế mơnhông mơdêk.

A Sa Ly tơplôu ƀă tơbleăng