VOV4.Sêdang - Kơxê măng lơ 8/6, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i hiăng tơpui phôn ƀă jâ Valentina Matvienko, Kăn xiâm hnê ngăn Hô̆i đong kong têa Rusi. Pôa Vương Đình Huệ prế jâ Valentina Matvienko pơrá tối, tung pơla kố nah, tơrŭm cheăng kal kí pơla péa tơnêi têa đi đo thăm mơnhông ƀă mơnhông lĕm tro tung tâi tâng mâu ƀâng Đảng, Tơnêi têa xuân môi tiah mâu kong pơlê, khu tê mơdró ƀă khu tơrŭm cheăng pơlê pơla péa tơnêi têa.

Pôa Vương Đình Huệ, Kăn xiâm hnê ngăn Kuô̆k hô̆i tơpui phôn ƀă Kăn xiâm hnê ngăn Hô̆i đông kong têa Rusi

Péa kăn xiâm pơkuâ rơtế mơnhên, mơhé tung pơla Covid 19 pro tơdjâk troh tơdroăng cheăng kâ mâu kong têa, mâu tơdroăng tơrŭm cheăng kâ, tê mơdró, mơ’no liăn cheăng Việt Nam – Rusi ai troăng pơ’lêh nhên. Klăng roh kố, pôa Vương Đình Huệ mơnê kong têa Rusi hiăng diâp ăm Việt Nam 1.000 klŏng pơkeăng vaccine Sputnik V sap apoăng hơnăm kố ƀă nếo achê kố hiăng tơkêa kơjo vâ Việt Nam châ rôe 20 rơtuh klŏng pơkeăng vaccine Sputnik V; tối nhên Việt Nam pói vâ tơrŭm cheăng ƀă kong têa Rusi tung kơvâ pơcháu ăm kơmăi kơmok ƀă mơjiâng vaccine hbrâ mơdât Covid 19 a Việt Nam.

            A Sa Ly tơplôu ƀă tơbleăng