VOV4.Sêdang - Hâi lơ 10/5, a tơring Tiên Lãng, pôa Vương Đình Huệ, Kăn xiâm hnê ngăn Kuô̆k hô̆i rơtế ƀă mâu kăn Kuô̆k hô̆i hneăng 15 pơtối trâm mâ kuăn pơlê ƀă hnê ‘na tơdroăng tâ phĭu a tíu tâ phĭu kơxô̆ 3, pơlê kong kân Hải Phòng, mâu pơlê krâm, tơring Kiến An, Dương Kinh, An Lão, Tiên Lãng ƀă Vĩnh Bảo. A hneăng hôp, kuăn pơlê dêi tơring Tiên Lãng vâ môi tuăn ƀă tơdroăng pêi pro dêi mâu kăn, hlối tối loi khât a mâu ngế ki lo tơbriât pro kăn, Kuăn pơlê tung tơring púi vâ mâu kăn ki châ rah xo mê ah kô pơtối rak vế tơdroăng ki rơkê tung pêi cheăng, pêi cheăng tâi hnoăng tơná cho ngế kăn Kuô̆k hô̆i achê kuăn pơlê tâ, tơmâng kuăn pơlê tơpui ƀă nhoăm mâu tơdroăng ki kuăn pơlê tối.

Pôa Vương Đình Huệ, Kăn xiâm hnê ngăn Kuô̆k hô̆i tối tơbleăng tơdroăng pêi pro

Teăng mâ mâu ngế ki lo tơbriât pro kăn hnê ngăn Kuô̆k hô̆i a tíu tâ phĭu kơxô̆ 3, pôa Vương Đình Huệ mơnê, tơmâng xo mâu tơdroăng veăng hnê tối, pêi cheăng tâi tá hiâm mơno, tâi hnoăng cheăng dêi mâu kuăn pơlê ki tâ tâ phĭu.

Pakĭng mê tối, tâng châ rah xo kô pêi tro hnoăng cheăng tơná ngế kăn, pê klêi mâu tơdroăng ki hiăng tơhrâ ƀă kuăn pơlê, malối achê kuăn pơlê tâ, cho tíu ki tơdjêp vâ tơbleăng tơdroăng ki kuăn pơlê tối, tơdroăng púi vâ dêi kuăn pơlê ăm Kuô̆k hô̆i.

Gương tơplôu ƀă tơbleăng