VOV4.Sêdang - Teăng mâ Ngế pro xiâm hnê ngăn Chin phuh, pôa Lê Văn Thành, Ngế pro xiâm phŏ hnê ngăn Chin phuh nếo kĭ pơkâ tơdroăng kơxô̆ 26 hâi lơ 21/9/2021 ‘na mơdêk pêt mơjiâng, pơto chơ, tê ƀă tê ngi kong têa ê mâu kế tơmeăm pêi lo ing chiâk deăng tung pơla tơdroăng ki hbrâ mơdât pơreăng COVID-19. Tiah mê, Ngế pro xiâm hnê ngăn Chin phuh pơkâ thế Khu xiâm ngăn chiâk deăng ƀă Mơnhông thôn pơlê ƀă mâu kong pơlê tơbleăng tơdâng tơ’mô mâu troăng hơlâ rak tơniăn pôi tá ăm trâm tơdroăng ki xơpá tung pêt mơjiâng kế tơmeăm ing chiâk deăng; pêi pro châ tiô tơdroăng ki rơhêng vâ ai tŭm mâu kế tơmeăm pêi lo ing chiâk deăng ăm tơdroăng ki vâ tê tung tơnêi têa ƀă uâ pơliê, tê ngi kong têa ê tung mâu tơdroăng.

Khu xiâm ngăn cheăng kơmăi kơmok ƀă tê mơdró hnê mơhno mâu kong pơlê hiăng kâi hbrâ mơdât pơreăng vêh po nếo mâu kơchơ tê mơdró tiah hmâ, kơchơ xiâm vâ rĕng tê kế tơmeăm ăm kuăn pơlê; tơrŭm ƀă mâu khu xiâm, kơvâ cheăng mơdêk lôu péa kơchơ mơdró tê tơmeăm pêi lo ing chiâk deăng ngi kong têa Sinuâ.

Khu xiâm ngăn troăng prôk ƀă rơxế kơtâu rak tơniăn troăng prôk tơdroăng ki chơ tơmeăm tung lâp tơnêi têa, pro tơ’lêi hlâu má môi ăm tơdroăng ki chơ kế tơmeăm, pơkeăng kum ăm tơdroăng ki pêi chiâk deăng ƀă tê ngi kong têa ê. Mâu kong pơlê tơbleăng tơdrêng tơdroăng pơkâ dêi Chin phuh ‘na tŏng kum khu mơdró kâ, khu pêi cheăng tơrŭm, rơpŏng tê mơdró tung pơla ai pơreăng COVID-19, rak tơniăn hnoăng cheăng hbrâ mơdât pơreăng a tíu pêi cheăng ăm tơtro ƀă tơdroăng ki ai khât a kong pơlê.

Katarina Nga tơplôu ƀă tơbleăng