VOV4.Sêdang - Pin hbrâ vâ chê troh hâi tâi tâng kuăn pơlê lăm tâ phĭu vâ rah pôk xo mâu ngế ki ai tuăn mơno lĕm tơdrăng, kơhnâ, rơkê cheăng vâ teăng mâ ăm rơkong tơpui tối dêi kuăn pơlê tung tíu cheăng Kuô̆k hô̆i, tíu cheăng Hô̆i đong hnê ngăn kuăn pơlê rêm râ. Môi tơdroăng ki kuăn pơlê đi đo tơmâng ngăn, mê cho klêi kơ’nâi hiăng châ pôk, kăn ki mê kô pêi pro tiô dêi rơkong tơná hiăng tơhrâ ƀă kuăn pơlê môi tiah lâi, tơdroăng ki séa ngăn rơkong tơhrâ dêi kăn ki mê tiah lâi. Tơdroăng kố, kô vâ tối mơnhên tung ƀai chêh “Troăng hơlâ ki lâi vâ séa ngăn rơkong tơhrâ dêi kăn ƀă kuăn pơlê?”

Tâng idrâp pơ’lok pơ’lâ ing tơdroăng ki vâi hơdruê karaoke, ing vâi mơ’no loa kơthung ki kân tê kĕo kéo mơ’no tâi ivá châ Kăn hnê ngăn Vi ƀan Măt trâ̆n tơnêi têa Pơlê kong kân Hồ Chí Minh tơkŭm tơdroăng ki veăng tơpui tối dêi kuăn pơlê ƀă tơbleăng a rôh hôp má 20 dêi Hô̆i đong hnê ngăn kuăn pơlê dêi Pơlê kong kân Hồ Chí Minh hneăng 9 hiăng pro hâi kơ-êng tiâ, tơpui tơno hên tơdroăng. Pôa Nguyễn Thành Phong - Kăn xiâm hnê ngăn Vi ƀan pơlê kong kân Hồ Chí Minh ƀă kăn Hô̆i đong kong pơlê hneăng má 9 xuân xo tin nhắn ki pơtroh tơdrêng dêi kuăn pơlê tối tô tuăn mâu tơdroăng a kơpêng. Pôa Phong ăm ‘nâi, drêng hlo tin nhắn dêi kuăn pơlê, pôa hiăng pơtroh ăm mâu kăn tung pơlê kong kân hôm ai tối klâi vâ séa ngăn klêi mê tơleăng mơnhên.

Pơlê kong kân Hồ Chí Minh xuân thâ pêi pro vâ ai môi tơdroăng pêi pro ki nhên khât vâ mơdât mâu tơdroăng ki ôh tá tơniăn ‘na pơlê pơla ki hơdruê ‘na karaokde, mơ’no loa kĕo kéo, mơ’no ăm chuât ki têi tơdjâk troh kuăn pơlê. Tiô pôa Nguyễn Thành Phong, pôa đi đo mơ-eăm tơleăng mơnhên tơrêm tơdroăng ki tro hnoăng tơná chiâng phêp pêi, vâ pôi ta tâng rôh kơ’nâi ah kuăn pơlê vêh tối nếo:

“Hmâ trâm mâ kuăn pơlê ing mâu tơdroăng veăng hnê tối dêi kuăn pơlê klêi mê ƀơrô Vi ƀan tơkŭm mâu tơdroăng hnê kuăn pơlê veăng hnê tối mê troh tơrêm tíu pêi cheăng, ki lâi râ pơlê krâm tơleăng mơnhên mê ăm pơlê krâm tơleăng mơnhên tơdroăng mê, ki lâi tro kong pơlê tơleăng mơnhên mê kong pơlê tơleăng ƀă mâu tơdroăng veăng hnê tối dêi mâu tiu pêi cheăng ai tiâ mơnhên ƀă tơleăng hrâ hrế vâ rôh kơ’nâi ah drêng trâm mâ kuăn pơlê ôh tá tâng tối xếo tơdroăng mê, tơdroăng ki kuăn pơlê tối hdrối mê’’.

Môi tung mâu tơdroăng tơhrâ dêi mâu kăn ƀă kuăn pơlê châ pêi pro, la xuân ối hên rơkong tơhrâ hdrối nah hiăng ton ta hâi hlo kâi pêi pro, ‘mâi rơnêu, lơ hơ’lêh. Hiăng chât hơnăm kố, rơpŏng hngêi jâ Phạm Thị The dế rêh ối a tơdroăng tơkêa bro ki hâi tá kâi pro Bình Quới- Thanh Đa. Rơpŏng hngêi jâ ôh tá châ vâ ‘mâi rơnêu dêi hngêi ối, vâ tê dêi hngêi, lơ vâ klâ xĭng xoăng ăm dêi rơpó tung rơpŏng xúa tơnêi ki mê, xua ôh tá chiâng vâ pro hlá mơ-éa tro tiô kơ luât.

Tiô jâ The, tơdroăng mê châ tơbleăng a hên rôh trâm mâ kuăn pơlê dêi mâu kăn ki kuăn pơlê rah xo la troh nôkố vâi bú tâng to tơdroăng tơhrâ tơkêa tê. Jâ The ƀă hên rơpâu rơpŏng kuăn pơlê akố bú púi vâ mâu kăn rĕg tơleăng mơnhên tơdroăng pơkâ ki mê vâ kuăn pơlê châ tơniăn tung rêh ối, cheăng kâ.

Ƀă kuăn pơlê, tơdroăng ki vâi tô tuăn, mê ti lâi hên mâu kăn tối tơbleăng tơhrâ ƀă kuăn pơlê la troh mơ’nui hneăng tơná pro kăn xuân hâi kâi hlo pêi pro, rơkong ki tơhrâ mê môi tiah lo tơbriât pro kăn. Tơdroăng séa ngăn rơkong tơhrâ dêi mâu kăn, tiô luâ̆t sư Trương Thị Hòa, Ngế cheăng tung Măt trâ̆n tơnêi têa Việt Nam Pơlê kong kân Hồ Chí Minh tối, ki hmâ hlo ing tơdroăng tối tơbleăng a mâu rôh trâm mâ kuăn pơlê. Tối tơbleăng kum kuăn pơlê ‘nâi rơkong ki tơhrâ dêi mâu kăn hiăng pêi pro troh dâng lâi, tơvâ tơvân a tíu ki lâi, xua tơdroăng klâi, xua ôh tá xê tơdroăng tơhrâ ki lâi mơhé rĕng lơ hrá xuân chiâng pêi  tâi tâng. Laga, tơdroăng mê a mâu roh trâm mâ kuăn pơlê hâi châ pêi pro tro khât:

“Séa ngăn nôkố a tơmiât tâng pin pơkâ tối tơbleăng môi tiah lâi tung rôh trâm mâ ƀă kuăn pơlê. Mê pin tối tơbleăng tiah kố tâng pơchông ƀă tơdroăng pêi pro mê mâu kăn hiăng pêi ki klâi? Mê á hlo tiah kố, tơdroăng ki kal tung mâu rôh trâm mâ kuăn pơlê ôh tá tŭm hâi chôu lơ ti lâi mê hâi pêi pro tơdroăng ki mê. Pakĭng trâm mâ kuăn pơlê xuân thế ai troăng hơkâ pơkâ vâ mâu kăn ki mê châ pêi mâu tơdroăng ki lâi ‘lo tung tơdroăng tối tơbleăng ăm kuăn pơlê ‘nâi. Pin hâi pro tơ’lêi hlâu vâ pêi”.

Pôa Trân Việt Anh, Ngế cheăng tung Vi ƀan xiâm Măt trâ̆n tơnêi têa Việt Nam ăm ‘nâi: Măt trâ̆n tơnêi têa Việt Nam rêm râ tơrŭm ƀă mâu kơ koan teăng mâ mâu kuăn pơlê dêi Kuô̆k hô̆i ƀă kong pơlê đi đo tối nếo mâu tơdroăng pêi pro dêi mâu kăn. Laga, pôa Trần Việt Anh tối thế pêi pro nhên ƀă tơdroăng pơkâ ƀă tí tăng ‘nâi ‘na luât ki hơ’lêh rơkong tơhrâ. Ai tiah mê ‘nôi nếo kum kuăn pơlê ‘nâi rơkong tơhrâ dêi mâu kăn hiăng pêi pro môi tiah lâi ƀă vêh po nếo roh hôp mâu kăn xuân chiâng tơbleăng ăm kuăn pơlê ‘nâi rơkong ki tơná hiăng tơhrâ pêi dế tơvâ tơdroăng klâi:

“Luât mơjiâng ing tơdroăng pêi cheăng dêi mâu kăn Kuô̆k hô̆i ƀă kăn hnê ngăn Hô̆i đong kong pơlê. Mê tối cho luât pêi cheăng dêi mâu kăn hnê ngăn kuăn pơlê. Kố cho tơdroăng ki á tơmiât cho kal, la  ki hdrối tâ thế ai pơkâ vâ pêi mâu pơkâ ki mê thế pêi môi tiah tơdroăng cheăng pó thế pêi”.

Pơkâ tơdroăng pêi pro tiô pơkâ ƀă mâu tơdroăng cheăng séa ngăn rơkong tơhrâ dêi mâu kăn, Tiê̆n sih Vũ Trung Kiên, Kăn xiâm phŏ kơvâ  mơjiâng Đảng - Hngêi trung hnê tơdroăng kal kí kơpong 2 tối tiah kố, tơdroăng séa ngăn dêi kuăn pơlê cho kal má môi. Tâng kuăn pơlê tơmâng khât mê kô kơ-êng mâu kăn thế tơbleăng nếo  tơdroăng kơ êng tung rôh trâm mâ drêng ê:

“Pin púi vâ vâi krâ-nhŏng o mâ tá hơtô, lơ kho khéa, lơ preá xâu ƀă hnoăng cheăng pơkuâ rak tơnêi têa, pơlê pơla, la pin púi vâ mâu ngế ki lâi ‘lo ki rơkê kơhnâ tung cheăng kâ, rêh ối, môi tiah mâu vâi pú ki hiăng pơtê cheăng xua hơnăm hiăng krâ, mâu vâi pú kăn lêng, mâu ngế ki rơkê, mâu ngế ki veăng tơplâ hneăng hdrối ƀă hên ngế ki ê...  vâi ki mê kal athế mơ-eăm vâ veăng séa ngăn, tơpui tối ƀă mâu kăn ƀă kơ-êng mâu kăn pơkuâ i hên, i nhên tâ’’.

Tơkéa vâ tối, mâu kăn kuăn pơlê rah xo cho hâk tơngăm kân khât dêi rêm ngế, xua vâi cho ngế ki châ kuăn pơlê loi tơngah khât vâ pro ngế teăng mâ ăm tơdroăng pơkuâ, ăm tơdroăng púi rơhêng vâ dêi kuăn pơlê; teăng mâ kuăn pơlê pêi hnoăng cheăng dêi tơnêi têa. Pơkâ rah xo nhên khât, kal má môi thế pơtối rak vế tro môi tuăn môi tiah kuăn pơlê hiăng tơrŭm vâ môi tuăn, pôu râng hnoăng cheăng dêi kuăn pơlê ki kuăn pơlê vâ rah xo, cho mâu ngế ki tơxâng; mâu ki ai tuăn hiâm lĕm tơdrăng, kơhnâ rơkê, mơ-eăm pêi cheăng xua vâ mơnhông kuăn pơlê, xua vâ mơdêk tơnêi têa.

Trung tâm tin

Gương tơplôu ƀă tơbleăng