VOV4.XơĐăng - Tiô pơkâ kơxô̆ 07/2021 dêi Chin phuh pơkâ tro kơtiê ki hên troăng hneăng hơnăm 2021 – 2025, sap ing hơnăm 2022, pêi lo liăn rêm ngế pá xôp 1 rơtuh 500 rơpâu liăn môi ngế tung môi khế kơpong thôn pơlê ƀă pá xôp 2 rơtuh liăn môi ngế tung môi ngế a pơlê kong kơdrâm kô châ chêh ‘mot tung rơpŏng kơtiê, vâ chê kơtiê. Tung hneăng hơnăm 2022 – 2025, Việt Nam kô xúa tơdroăng ki tro kơtiê ki hên troăng nếo ƀă tơdroăng ki mơdêk kơlo pơkâ tro kơtiê ‘na pêi lo liăn ƀă mơnhên tơ’nôm kơtiê khât nếo ‘na cheăng pêi.

Tiah mê, kơlo ki kơtiê khât ƀă rơpŏng kơtiê, vâ chê kơtiê ‘na pêi lo liăn kô xo tơdjuôm kơlo 1 rơtuh 500 rơpâu liăn môi ngế tung môi khế kơpong thôn pơlê ƀă 2 rơtuh liăn môi ngế tung môi khế kơpong pơlê kong kơdrâm. Rơpŏng kơtiê vâ chê kơtiê kô phá tơ-ê dêi rơpó a tơdroăng pơkâ dêi pơlê pơla tá hâi tŭm. Tơdroăng ki ‘mâi rơnêu kố kô mơhnhôk kong pơlê tơmâng ngăn ‘no liăn cheăng kơdroh kơtiê ăm mâu rơpŏng kuăn pơlê a mâu tơdroăng ki ối kal pakĭng tơdroăng ki pêi lo liăn.

Tơdroăng ki mơdêk pơkâ ‘na kơlo liăn pêi lo mơnhên kơtiê nếo ƀă mâu tơdroăng pơlê pơla kô pro mơdêk kơxô̆ rơpŏng kơtiê, vâ chê kơtiê. Laga, troăng hơlâ tŏng kum kô châ tŏng kum tŭm ƀă tŏng kum tơtro tâ troh mâu rơpŏng kơtiê, vâ chê kơtiê tung hneăng hơnăm sap ing hơnăm 2022 – 2025.

Katarina Nga tơplôu ƀă tơbleăng