VOV4.Sêdang - Kơxo lơ 19/3, a tíu pêi cheăng Chin phuh, Khu pơkuâ hnê mơhno tơnêi têa hbrâ mơdât pơreăng Covid 19 hiăng tơkŭm tơpui tơno ‘na mâu troăng vâ pêi pro “Mơ-éa vaccine’’ tung la ngiâ, kum pro tơ’lêi hlâu tơdah mơngế Việt Nam ing kong têa ê vêh a tơnêi têa, tung mê, pơkâ troăng pro tơ’lêi hlâu ‘na tởdoăng pâk vaccine Covid 19 dêi kuăn pơlê ƀă tơdroăng tối tơbleăng kuăn pơlê tơnêi têa.

Ƀă kuăn pơlê tung tơnêi têa, Khu xiâm pơkuâ ngăn pơkeăng ƀă khăm pơlât tối ăm ‘nâi, kô xing xoăng ăm mah QR code ăm rêm ngế hiăng pâk vaccine Covid 19 hdró tung hô sơ pơkuâ ivá krê vâ ai tŭm tơdroăng tâng kal mơnhên hiăng pâk vaccine drêng lăm ngi kong têa ê. Tơdroăng kố, pôa Vũ Đức Đam, Ngế pro xiâm phŏ hnê ngăn tơnêi têa tối nhên: Troăng pêi dêi Việt Nam cho pơkuâ ing kơmăi pơkuâ hô sơ ivá kuăn pơlê, hdró tơdroăng ‘na pâk ƀă tơdjêp ƀă tơdroăng tối tơbleăng kuăn pơlê, pro tơ’lêi hlâu má môi ăm kuăn pơlê tung pâk, mơdât tơdroăng prôk lăm drêng ai pơreăng la ngiâ tiô troăng môi tuăn ƀă tơ’lêi má môi.

A Sa Ly tơplôu ƀă tơbleăng