VOV4.Sêdang - Ôh tá păng hlâk koi, châi ko, pôu prĭng ko mơni kô hmâ hlo, hmâ ai ƀă rêm ngế pin, la tâng tơdroăng ki mê hmâ hlo ai đi đo, kal athế rĕng teăm khăm pơlât tơdrêng. Tơdroăng: “Ivá ăm rêm ngế” hâi kố, ngin ai tơbleăng tối ‘na troăng hơlâ vâ kum tá ti păng koi, châi ko, pôu prĭng ko ki tơniăn vâ khoh châ koi hlâk lĕm tơniăn ăm ivá.

Chôu koi cho chôu ki ôh tá chiâng tơdro, mâ ôh tá ngăn, tuăn ôh tá tâng, rơkong ôh tá tơpui..., tơkéa vâ tối ngôa ôh tá pêi cheăng. Drêng kố bú ai to plâi nuih tê kơtâu vâ kum ăm mơheăm châ kơtâu  troh a  rêm tíu tung châ vâ ’mot ô-xy ƀă mâu trếo ki lĕm  pro hơ’leh mâu trếo ki lĕm vâ ăm tung châ mo lĕm. Môi ngế ki hmâ oh tá ai tơdroăng klâi tung châ thế koi ki iâ gá cho 7 chôu tung môi hâi. Koi hlâk lĕm kô kum pro ăm mâu tíu mâu kế ki vâ pêi cheăng tung châ kô châ pơtê ƀă pro ăm xông lĕm nếo, tung mê, ai hơ’neh ƀă mâu kế ki vâ mơjiâng chiâng kơxái hveăn. 

A mâu hơnăm ối nếo drêng vâi koi  hmâ koi hlâk ƀă ôh tá tơdjâk klâi ing kế ki chuât pá gong. Ƀă mâu hơnăm hiăng hên koi ôh tá chiâng hlâk hlối, dế koi klêi mê hmôu pơ chiâng riu. Kố cho tơdroăng ki vâ mơhno gá tiah hmâ ‘na tơdroăng koi hlâk ƀă ki gá pro lĕm ăm ivá.

Tơdroăng ôh tá chiâng koi hlâk kal thế rĕng tơmâng tâng hiăng troh chôu koi xuân ôh tá chiâng koi,tung ko xuân hmôu pơ ối  tơmiât tơdroăng kố tơdroăng mê, thăm nếo troh kơmăng dế, lơ luâ kơmăng dế xuân ôh tá chiâng koi, tâng koi bú koi iâ tê ôh tá hlâk lĕm. Troh kơxo má riu koi tung châ rơlâi rơlo. Tâng môi ngế ki ôh tá châ koi 6 chôu cho túa ôh tá păng chiâng koi. Ôh tá chiâng koi cho tơdroăng ki ăm hlo kô pro chiâng châi ko, pôu prĭng ko, ki ‘nâ xua ing tung châ ai tơdroăng châi ki ê.

Ai hên xiâm tơdroăng ki pro chiâng ôh tá păng koi, môi tiah hơ’leh chôu; Oh tá păng chiâng koi xua pơ’lok lơ xua ing kong tô lơ kong lối hngíu, xua kâ mâu kế kâ ki pro ôh tá chiâng koi lơ xua ôu têa chếi, ôu kơphế ƀă hên ki ê. Mâu tơdroăng ki xiâm mê xuân chiâng vâ pro ăm tơ’lêi koi ‘nâ hía to  ton ah kô hía kô pro chiâng koi hlâk lĕm. La tâng pin ôh tá păng koi xua ing ai tơdroăng châi tung châ môi tiah tơngê kơ-o kơ-ôk, châi ko lơ xua tung châ ai tơdroăng châi tiô rơnó môi tiah xua rế ôh tá krá lĕm kơxêng rơnŏng pro ăm kơxêng rế hŏn chiâng mơdiê hmât troăng mơheăm ki vâ djâ mơheăm kơtâu  troh a ngôa, ngôa chiâng ôh tá ai ô-xy ƀă mâu trếo kơhiâm ki vâ mơ’rêh ngôa, mâu kế  ki vâ mơjiâng chiâng mơheăm ngôa, ‘nâ chiâng ai xêh mâu kế ki vâ pro chiâng krâ ƀă hên ki ê mê gá ôh tá xê to pro ôh tá chiâng koi hlâk mê ối pro chiâng châi ko, vung vế ko.

Tâng hmôu pơ ôh tá păng koi ton châ 1 khế la ôh tá kâi chiâng vâ pro ăm vêh kloi hlâk lĕm tiah mê kô chiâng tơdroăng ki hmâ tiô rơnó, tơdjâk troh tơdroăng rêh ối dêi ngế ki mê.  

Vâ pro ăm chiâng koi hlâk, vâi krâ nhŏng o ƀă pú hmâ thế séa ngăn dêi chôu koi, kơbong koi thế rơhĭng, pôi tá lối tô a rơnó mơdrăng, pôi tá lối hngíu a rơnó hngíu... Thế tơtrŏng pôi tá kâ mâu kế kâ têa ôu ki pro tơdjâk troh tung pơtok nong, pôi tá kâ kế ki kho, kế kâ ki hên đăm a kơxêi măng, pôi tá ôu têa chế, pôi tá ôu kơphế, pôi tá ôu têa lơ kế kâ ki pro ôh tá păng hêng koi.  Bú chiâng ôu pơkeăng pro koi hlâk drêng ai ƀok thái pơkeăng hnê, ôu hên kô pro ôh tá lĕm kliâm, kơkốu, tâng ôu luâ tơdroăng kô pro chiên tâk thăm nếo kô hlâ.

Vâ pro ăm chiâng koi hlâk châ koi tơniăn lĕm ƀă tơ-brê, pakĭng thế tơmâng ngăn chôu koi ƀă tíu koi, vâi krâ nhŏng o xuân chiâng kâ ôu mâu kơchâi kế kâ ki pro ăm chiâng koi hlâk, pro lĕm mơheăm mơdêk ăm mơheăm kơtâu lĕm, vâ tơ’mot tŭm mâu mơheăm châ kơtâu troh a ngôa, tơ’mot ô-xy ƀă trếo kơhiâm tung ngôa. Kố cho môi tơdroăng ki vâ pro ăm chiâng koi hlâk lĕm tơniăn ăm rêm ngế.

Ki xiâm pro ôh tá chiâng koi cho xua ôh tá ai mơheăm châ kơtâu troh a ngôa, xua ing ai kế tiê hmât troăng mơheăm ki vâ djâ mơheăm kơtâu troh a ngôa, xua ing stress lơ xua ing ai pơreăng ki pro a mơngế (êi xoang) cho êi rơtốu tung pơla kơxêng môh, ngiâ, ngôa, mâu ngế ki kơxêng rơnŏng rế ôh tá krá xua tíu ki tơdjâk pơla mâu kơxêng mê tro tiê hmât a mâu troăng mơheăm ki vâ kơtâu...

Xua mê vâ pro mơheăm lĕm pó thế rah kâ ôu mâu tơmeăm ki pro ăm mơheăm kơtâu lĕm mâu kế ki tơdjuôm cho Ginkgo Biloba...  Pakĭng Ginkgo Biloba mê cho tơmeăm ki pin rah xo thế ai Cao Blueberry ƀă  tơmeăm ki vâ pro ăm lĕm troăng mơheăm ngôa, mơdât châi plâi nuih...

Pakĭng mê ối kal ai mâu kế ki tơdjuôm xiâm cho vitamin B1, B2, B6 kô pro ăm troăng mơheăm ngôa rĕng vêh lĕm nếo.  Xua mê, vâ pro ăm chiâng koi hlâk, pôi tá châi ko, vung vế ko ƀă châ koi hlâk tơniăn lĕm, pó thế rah kâ ôu, mâu kế kâ ki ai trếo kơhiâm lĕm môi tiah nếo tối a kơpêng mê âi. 

Pakĭng mê, rêm ngế kal thế ăm tơná rêh ối tro tơdroăng, kâ ôu tŭm trếo kơhiâm vâ pro ăm chiâng koi hlâk, môi tiah kâ kloăng rĕng sen, pôm reăng sen, kâ kơchâi kế kâ ki ai trếo omega 3, kâ priât. Tơdrêng ƀă tơdroăng pro koi hlâk mê ngế ki lâi xuân thế kơhnâ pơtâp ivá rêm hâi, rah túa tâm chêng, ôu têa tô hơ-ol, ôu têa tôu ro hdrối vâ koi kô pro ăm chiâng koi hlâk lĕm.

Gương tơplôu ƀă tơbleăng